அய்யா வைகுண்டரை இழிவுபடுத்தும் வகையில் கேள்வி கேட்பதா? அண்ணாமலை கண்டனம்

டி.என்.பி.எஸ்.சி. தேர்வில் அய்யா வைகுண்டரை இழிவுபடுத்தும் வகையில் கேள்வி கேட்கப்பட்டதற்கு தமிழக பா.ஜனதா முன்னாள் தலைவர் அண்ணாமலை  கண்டனம் தெரிவித்துள்ளார்.

இதுகுறித்து அவர் வெளியிட்டுள்ள அறிக்கையில் "இளநிலை உதவி வரைவாளர் பணிக்காக நடைபெற்ற டி.என்.பி.எஸ்.சி. தேர்வில், அய்யா வைகுண்டர் குறித்த கேள்வியின் ஆங்கில மொழிபெயர்ப்பில், முடிசூடும் பெருமாள் என்ற அய்யா வைகுண்டரின் பெயரை, "முடிவெட்டும் கடவுள்" என்று மொழிபெயர்த்திருக்கிறார்கள். தமிழக அரசு பணிக்கான தேர்வில் பல கோடி மக்கள் வணங்கும் அய்யா வைகுண்டரின் மற்றொரு பெயரை இத்தனை கவனக்குறைவாகவும், பொறுப்பின்றியும் மொழிபெயர்த்திருப்பது கடுமையான கண்டனத்துக்குரியது.

மற்றொரு கேள்வியில், மக்களை தேடி மருத்துவம் திட்டத்தின் சரியான கூற்றுகளை கண்டறியவும் என்ற கேள்விக்கு, '2024-ம் ஆண்டு ஐக்கிய நாடுகள் சபையிடமிருந்து விருதை பெற்றது' என்பதை, 'பிச்சை எடுத்தார்கள்' என்று மொழிபெயர்த்திருக்கிறார்கள். அரசு பணி தேர்வுகளுக்காக கடுமையாக உழைக்கும் இளைஞர்களை அவமானப்படுத்தும் போக்கை, தி.மு.க. அரசு இதோடு நிறுத்திக்கொள்ளவேண்டும். இவ்வாறு அவர் கூறியுள்ளார். இதேபோல் பா.ம.க. தலைவர் டாக்டர் அன்புமணி ராமதாஸ், எர்ணாவூர் நாராயணன் தலைமையிலான சமத்துவ மக்கள் கழகமும் கண்டனம் தெரிவித்துள்ளது.