பூதப்பாண்டி கோவில் தேரோட்டம்: தோவாளை வட்டத்திற்கு 10ம் தேதி உள்ளூர் விடுமுறை!

இது தொடர்பாக கன்னியாகுமரி மாவட்ட ஆட்சியர் ஆர்.அழகுமீனா இன்று வெளியிட்டுள்ள செய்திக்குறிப்பில் "தமிழ்நாடு முதலமைச்சர் அவர்களின் ஆணைங்கிணக்கவும், நிதி சுற்றுச்சூழல் காலநிலை மாற்றத்துறை அமைச்சர் அவர்களின் தகவலின் படியும்தோவாளை வட்டம், பூதப்பாண்டி கிராமம் அருள்மிகு ஸ்ரீ பூதலிங்க சுவாமி சிவகாமி அம்மாள் திருக்கோவில் இந்துசமய அறநிலையத்துறை கட்டுப்பாட்டில் உள்ளது. 

இக்கோவிலில் ஆண்டுதோறும் தை மாதம் 10 நாட்கள் திருவிழா விமரிசையாக நடைபெறும். இந்த ஆண்டு இத்திருவிழாவானது 02.02.2025 அன்று கொடியேற்றத்துடன் தொடங்கி நடைபெற்று வருகிறது. தைப்பூச நட்சத்திரத்தின் முந்தைய நாளான (9-ம் நாள் திருவிழா) 10.02.2025 (திங்கள்கிழமை) அன்று நடைபெறும் தேரோட்ட நிகழ்வினை முன்னிட்டு தோவாளை வட்டத்தில் இயங்கும் அனைத்து மாநில அரசு அலுவலகங்கள் மற்றும் கல்வி நிறுவனங்களுக்கு உள்ளூர் விடுமுறை வழங்கி உத்தரவிடப்படுகிறது.

10.02.2025 அன்று அறிவிக்கப்பட்டுள்ள உள்ளூர் விடுமுறைக்கு ஈடாக 2025 பிப்ரவரி திங்கள் நான்காவது சனிக்கிழமை (22.02.2025) அன்று கன்னியாகுமரி மாவட்டத்தில் தோவாளை வட்டத்தில் இயங்கும் அனைத்து மாநில அரசு அலுவலகங்கள் மற்றும் கல்வி நிறுவனங்களுக்கு வேலை நாளாக இருக்கும்.

மேற்கண்ட உள்ளூர் விடுமுறை தினமானது செலவாணி முறிச் சட்டம் 1881 (Under Negotiable Instruments Act 1881)-இன் படி அறிவிக்கப்படவில்லை என்பதால் 10.02.2025 அன்று கன்னியாகுமரி மாவட்டத்தில் தலைமைக் கருவூலம் மற்றும் கிளைக் கருவூலங்கள் அரசு ஈடுபாடு சம்பந்தப்பட்ட அவசரப் பணிகளைக் கவனிக்கும் பொருட்டு, தேவையான பணியாளர்களைக் கொண்டு இயங்கும் என ஆட்சியர் ஆர்.அழகுமீனா தெரிவித்துள்ளார்.