ஈரானிய கச்சா எண்ணெய்: டாலருக்குப் பதிலாக சீன யுவானில் பணம் செலுத்திய இந்தியா!

உலக அளவில் எரிசக்தி தட்டுப்பாடு நிலவி வரும் சூழலில், ஈரானிடமிருந்து இறக்குமதி செய்த கச்சா எண்ணெய்க்கான தொகையை இந்தியா சீன கரன்சியான யுவானில் செலுத்தியுள்ளதாகத் தகவல்கள் வெளியாகியுள்ளன. இது உலக சந்தையில் அமெரிக்க டாலரின் ஆதிக்கத்திற்கு விழுந்த ஒரு முக்கிய அடியாகப் பார்க்கப்படுகிறது.

ஹோர்முஸ் நீரிணையில் ஏற்பட்ட போக்குவரத்து முடக்கம் மற்றும் ஈரான் மீதான ராணுவ நடவடிக்கைகள் காரணமாக உலகளவில் கச்சா எண்ணெய் தட்டுப்பாடு ஏற்பட்டது. விலையேற்றத்தைக் கட்டுப்படுத்த, அமெரிக்க அதிபர் டிரம்ப் நிர்வாகம், ஈரான் மற்றும் ரஷ்யாவிடமிருந்து கச்சா எண்ணெய் வாங்க இந்தியா உள்ளிட்ட சில நாடுகளுக்கு 30 நாட்கள் கால அவகாசம் (Waiver) வழங்கியிருந்தது.

ரஷ்யாவிற்கான இந்தச் சலுகை மே 16 வரை நீட்டிக்கப்பட்டுள்ள நிலையில், ஈரானிடமிருந்து எண்ணெய் வாங்குவதற்கான காலக்கெடு நாளை (ஏப்ரல் 19) உடன் முடிவடைகிறது. இந்தச் சலுகையை மேலும் நீட்டிக்கப் போவதில்லை என அமெரிக்கா திட்டவட்டமாகத் தெரிவித்துள்ளதால், இந்தியா தனது எரிசக்தித் தேவையைப் பூர்த்தி செய்ய மாற்று வழிகளை ஆராய்ந்து வருகிறது.

அமெரிக்காவின் தடையை மீறி அல்லது சலுகைக் காலத்தைப் பயன்படுத்தி, இந்திய சுத்திகரிப்பு ஆலைகள் (IOC மற்றும் ரிலையன்ஸ்) சுமார் 2 மில்லியன் பீப்பாய் ஈரானிய கச்சா எண்ணெயை இறக்குமதி செய்துள்ளன. இதன் மதிப்பு சுமார் 200 மில்லியன் டாலர் ஆகும்.

அமெரிக்க டாலரைப் பயன்படுத்தினால் ஏற்படக்கூடிய சிக்கல்களைத் தவிர்க்க, ஐ.சி.ஐ.சி.ஐ (ICICI) வங்கியின் ஷாங்காய் கிளை மூலமாக இந்தத் தொகையைச் சீன யுவானில் இந்தியா செலுத்தியுள்ளது. பொதுவாக விநியோகம் முடிந்த பின்பே பணம் செலுத்தப்படும் நிலையில், இம்முறை எண்ணெய் சரக்கு இந்தியக் கடற்பரப்பிற்குள் நுழைந்தவுடனேயே 95% தொகை செலுத்தப்பட்டது ஒரு குறிப்பிடத்தக்க மாற்றமாகக் கருதப்படுகிறது.

ஏற்கனவே ரஷ்யாவுடனான வர்த்தகத்தில் ரூபாய் மற்றும் திர்ஹாம் பயன்படுத்தப்பட்டு வரும் நிலையில், தற்போது ஈரானுடனான வர்த்தகத்தில் சீன யுவான் பயன்படுத்தப்பட்டுள்ளது. இது சர்வதேச வர்த்தகத்தில் 'டி-டாலரைசேஷன்' (De-dollarization) எனப்படும் டாலர் பயன்பாட்டைக் குறைக்கும் முயற்சியை வலுப்படுத்தியுள்ளது. ஹோர்முஸ் நீரிணையை ஈரான் கட்டுப்படுத்தி வரும் சூழலில், இந்தியாவின் இந்தச் செயல்முறை உலக நாடுகளின் கவனத்தை ஈர்த்துள்ளது.