அக்சர் படேலின் மேஜிக் கேட்ச்கள்; இங்கிலாந்தை முடக்கிய பும்ரா - இந்திய அணி வெற்றிப் பாதை!

ஐசிசி டி20 உலகக் கோப்பை அரையிறுதி ஆட்டத்தில் இங்கிலாந்தை வீழ்த்தி இந்திய அணி அபார வெற்றி பெற்றுள்ளது. மும்பையில் நேற்று நடைபெற்ற இந்த விறுவிறுப்பான ஆட்டத்தில் வீசப்பட்ட 40 ஓவர்களில் மொத்தம் 499 ரன்கள் குவிக்கப்பட்டன. பேட்டிங்கிற்கு சாதகமான இத்தகைய ‘மட்ட ரக’ ஆடுகளத்தில், பும்ராவின் பந்துவீச்சும் அக்சர் படேலின் அபாரமான கேட்ச்களுமே இந்திய வெற்றியின் அடித்தளமாக அமைந்தன.

மேற்கிந்தியத் தீவுகளுக்கு எதிராக 97 ரன்கள் விளாசிய அதே ஃபார்மைத் தொடர்ந்த சஞ்சு சாம்சன், நேற்றும் இங்கிலாந்து பந்துவீச்சைச் சிதறடித்தார். 42 பந்துகளில் 89 ரன்கள் குவித்து இந்திய அணியின் ஸ்கோர் உயர உதவினார். ஹாரி புரூக் தன்னிடம் வந்த கேட்சைத் தவறவிட்டதைச் சாதகமாக்கிக் கொண்ட சஞ்சு, மைதானத்தின் நாலாபுறமும் பவுண்டரிகளைப் பறக்கவிட்டார்.

இப்போட்டியின் மிகப்பெரிய திருப்புமுனை அக்சர் படேல் பிடித்த அந்த இரண்டு கேட்ச்கள் தான். குறிப்பாக, அபாயகரமான வீரர் ஹாரி புரூக் கொடுத்த கடினமான கேட்ச்சை, பின்னோக்கி ஓடிச் சென்று டைவ் அடித்து அக்சர் பிடித்த விதம், 1983 உலகக் கோப்பையில் விவியன் ரிச்சர்ட்ஸிற்கு கபில் தேவ் பிடித்த வரலாற்றுச் சிறப்புமிக்க கேட்ச்சுடன் ஒப்பிடத்தக்கது. இந்த ஒரு கேட்ச் இங்கிலாந்தின் வெற்றி வேகத்தைத் தடுத்து நிறுத்தியது.

இங்கிலாந்து அணி அதிரடியாகத் தொடக்கத்தைத் தந்தாலும், சூர்யகுமார் தனது துருப்புச் சீட்டான பும்ராவைச் சரியான நேரத்தில் பயன்படுத்தினார். இங்கிலாந்துக்கு ஓவருக்கு 13.80 ரன்கள் தேவைப்பட்ட நிலையில், பும்ரா தனது வேகத்தை மாற்றியும், துல்லியமான யார்க்கர்களை வீசியும் வெறும் 8 ரன்கள் மட்டுமே தந்தார்.

இதுவே போட்டியின் தலைவிதியை மாற்றியது. 94 ரன்களுடன் சதத்தை நெருங்கிக் கொண்டிருந்த ஜேக்கப் பெத்தேல் மற்றும் சாம் கரண் ஜோடியை, தனது 6 யார்க்கர் பந்துகள் மூலம் பும்ரா கட்டிப்போட்டார். அந்த ஓவரில் பவுண்டரியே கொடுக்காமல் வெறும் 6 ரன்கள் மட்டுமே வழங்கி, இங்கிலாந்தின் வெற்றி வாய்ப்பைத் தகர்த்தார்.

ஆட்ட நாயகன் விருது பெற்ற சஞ்சு சாம்சன் பேசுகையில், "இந்த விருது பும்ராவுக்குத்தான் போயிருக்க வேண்டும். அவர் அந்த ஓவர்களை வீசவில்லை என்றால் நான் இன்று இங்கு (வெற்றி நாயகனாக) நின்று கொண்டிருக்க மாட்டேன்" என நெகிழ்ச்சியுடன் குறிப்பிட்டார்.