கனரக லாரி மோதி மின்கம்பம் முறிந்து விழுந்தது : மின்சாரம் துண்டிக்கப்பட்டதால் உயிர்ச்சேதம் தவிர்ப்பு!

சாத்தான்குளம் அருகே கனரக லாரி மோதி மின்கம்பம் முறிந்து விழுந்த விபத்தில், உயர் அழுத்த மின்சாரம் உடனடியாகத் துண்டிக்கப்பட்டதால் பெரும் உயிர்ச்சேதம் தவிர்க்கப்பட்டுள்ளது. விபத்துகளைத் தடுக்கக் கனரக வாகனங்கள் ஊருக்குள் வரத் தடை விதிக்க வேண்டும் என அப்பகுதி மக்கள் கோரிக்கை விடுத்துள்ளனர்.

தூத்துக்குடி மாவட்டம் குலசேகரப்பட்டினம் இஸ்ரோ (ISRO) திட்டப் பணிகளுக்காகச் சாத்தான்குளம் அருகே உள்ள சுப்பராயபுரம், முதலூர், பொத்தகாலன்விளை, மணிநகர், படுக்கப்பத்து வழியாக நாள்தோறும் அதிக பாரம் ஏற்றிய கனரக லாரிகளில் கற்கள் மற்றும் மணல் கொண்டு செல்லப்படுகின்றன. 

இந்நிலையில், நேற்று பிற்பகல் குலசேகரப்பட்டினத்தில் பாரத்தை இறக்கிவிட்டுச் சுப்பராயபுரம் வழியாகத் திரும்பிய கனரக லாரி ஒன்று, ஊரின் மையப்பகுதியில் சாலையோர மின்கம்பத்தில் மோதியது. இதில் மின்கம்பம் முறிந்து லாரியின் மீது சரிந்ததோடு, உயர் அழுத்த மின் கம்பிகளும் அறுந்து விழுந்தன. உடனடியாக மின்சாரம் துண்டிக்கப்பட்டதாலும், அந்த நேரத்தில் ஆட்கள் நடமாட்டம் இல்லாததாலும் பெரும் விபத்து ஏதும் ஏற்படாமல் மக்கள் தப்பினர்.

தகவலறிந்து வந்த மின்வாரிய ஊழியர்கள் மின்கம்பத்தைச் சீரமைக்கும் பணியில் ஈடுபட்டனர். இதற்கிடையே, இப்பகுதியில் லாரிகளால் ஏற்கனவே இரண்டுக்கும் மேற்பட்ட மின்கம்பங்கள் சேதமடைந்துள்ளதாகக் கூறி கிராம மக்கள் அச்சம் தெரிவித்தனர். இதுகுறித்து தகவல் அறிந்த சாத்தான்குளம் வட்டாட்சியர் ராஜேஸ்வரி மற்றும் சாத்தான்குளம் காவல் உதவி ஆய்வாளர் சிவராஜா ஆகியோர் சம்பவ இடத்தை நேரில் பார்வையிட்டு ஆய்வு செய்தனர்.

அப்போது, சுப்பராயபுரம் பகுதியின் குறுகலான சாலைகளில் அதிவேகமாகச் செல்லும் கனரக லாரிகளால் பொதுமக்களின் உயிருக்கு அச்சுறுத்தல் ஏற்பட்டுள்ளதாகவும், சாலைகள் முற்றிலும் சேதமடைந்துள்ளதாகவும் கூறி, லாரிகள் ஊருக்குள் நுழைவதைத் தடை செய்யக் கோரி மக்கள் அதிகாரிகளிடம் மனு அளித்தனர். மனுவைப் பெற்றுக்கொண்ட வட்டாட்சியர், இதுகுறித்து உரிய நடவடிக்கை எடுக்கப் பரிந்துரைப்பதாக உறுதி அளித்தார்.