நடிகர் ரஜினிகாந்தை நேரில் சந்தித்துப் பேசினார் பாஜக தலைவர் நயினார் நாகேந்திரன்!

தமிழகத்தில் சட்டமன்ற தேர்தல் முடிவுகளுக்குப் பிறகு பல்வேறு அரசியல் பரபரப்புகள் நிலவி வரும் சூழலில், சென்னை போயஸ் கார்டனில் உள்ள இல்லத்தில் நடிகர் ரஜினிகாந்தை, தமிழக பாஜக தலைவர் நயினார் நாகேந்திரன் நேரில் சந்தித்துப் பேசியுள்ளார்.

தமிழகத்தில் அண்மையில் நடைபெற்ற சட்டமன்றத் தேர்தல் முடிவுகளின்படி ஆட்சி மாற்றம் ஏற்பட்டு, தமிழக வெற்றிக் கழகத்தின் தலைவர் விஜய் முதல்வராகப் பதவியேற்றுள்ளார். இத்தகைய அரசியல் மாற்றங்களுக்கு மத்தியில் இந்தச் சந்திப்பு நிகழ்ந்துள்ளது முக்கியத்துவம் வாய்ந்ததாகக் கருதப்படுகிறது.

இந்தச் சந்திப்பின் போது, பிரதமர் நரேந்திர மோடியின் 12 ஆண்டு கால ஆட்சிச் சாதனைகளை விளக்கும் புத்தகத்தை ரஜினிகாந்திடம் நயினார் நாகேந்திரன் வழங்கினார். இந்தச் சந்திப்பில் தமிழக பாஜக மேலிடப் பொறுப்பாளர் அரவிந்த் மேனனும் உடனிருந்தார். தற்போதைய தமிழக அரசியல் சூழல் குறித்தும், அடுத்தகட்ட நகர்வுகள் குறித்தும் இந்தச் சந்திப்பில் ஆலோசிக்கப்பட்டிருக்கலாம் என்று அரசியல் வட்டாரங்கள் தெரிவிக்கின்றன.

தமிழக பாஜக முன்னாள் தலைவரான அண்ணாமலை, கட்சியில் இருந்து விலகி தனிக்கட்சி தொடங்க உள்ளதாகத் தகவல்கள் வெளியாகியுள்ளன. தற்போது அவர் "வி தி லீடர்ஸ்" என்ற புதிய இயக்கத்தைத் தொடங்கியுள்ளார். இந்த இயக்கத்தில் ஆன்லைன் வழியாக இதுவரை சுமார் 18 லட்சம் பேர் இணைந்துள்ளனர். அண்ணாமலை தனி இயக்கம் ஆரம்பித்துள்ள நிலையில், அவரது இயக்கத்தில் ரஜினியின் ரசிகர்கள் பலரும் ஆர்வத்துடன் இணைந்து வருவது அரசியல் வட்டாரத்தில் பரவலாகப் பேசப்பட்டு வருகிறது.

இதற்கிடையே, பிரபல நடன இயக்குநரும் நடிகருமான ராகவா லாரன்ஸும் அண்மையில் அரசியலில் நுழைவதாக அறிவித்துள்ளார். நடிகர் ரஜினிகாந்தின் ஆசிர்வாதத்துடன் தான் இந்த புதிய அரசியல் இயக்கத்தைத் தொடங்குவதாக ராகவா லாரன்ஸ் பேசியிருந்தார். தமிழக அரசியலில் புதிய கட்சிகளின் வரவு மற்றும் புதிய ஆட்சி மாற்றம் எனப் பல்வேறு பரபரப்பு திருப்பங்கள் அரங்கேறி வரும் நிலையில், ரஜினிகாந்தை பாஜக தலைவர் நயினார் நாகேந்திரன் சந்தித்து இருப்பது தமிழக அரசியலில் புதிய விவாதங்களை ஏற்படுத்தியுள்ளது.