முதல்வர் விஜய்யின் முதல் கையெழுத்து எது? - த.வெ.க. தேர்தல் அறிக்கையை எதிர்நோக்கும் தமிழகம்!

» செய்திகள் - விளையாட்டு » தமிழகம்

முதல்வர் விஜய்யின் முதல் கையெழுத்து எது? - த.வெ.க. தேர்தல் அறிக்கையை எதிர்நோக்கும் தமிழகம்!

புதன் 6, மே 2026 10:17:45 AM (IST)

விஜய் முதலமைச்சராகப் பொறுப்பேற்றதும், தேர்தல் வாக்குறுதிகளில் எதற்கு முன்னுரிமை அளித்துத் தனது முதல் கையெழுத்தைப் போடுவார் என்ற எதிர்பார்ப்பு மக்கள் மத்தியில் எழுந்துள்ளது.

தமிழகச் சட்டசபைத் தேர்தல் முடிவுகளின்படி, தமிழக வெற்றிக் கழகம் (த.வெ.க.) 108 இடங்களிலும், தி.மு.க. கூட்டணி 73 இடங்களிலும், அ.தி.மு.க. கூட்டணி 53 இடங்களிலும் வெற்றி பெற்றுள்ளன. எந்தவொரு கட்சிக்கும் ஆட்சி அமைக்கத் தேவையான அறுதிப் பெரும்பான்மை கிடைக்காததால், தமிழகத்தில் ‘தொங்கு சட்டசபை’ உருவாகியுள்ளது.

மொத்தமுள்ள 234 தொகுதிகளில், பெரும்பான்மையை நிரூபிக்க 118 இடங்கள் தேவை (பாதி இடங்களான 117-ஐ விட ஒன்று கூடுதல்). இந்த நிலையில், த.வெ.க. தனிப்பெரும் கட்சியாக உருவெடுத்துள்ளது.

வெற்றி பெற்ற வேட்பாளர்களுடன் த.வெ.க. தலைவர் விஜய் நேற்று ஆலோசனை நடத்தினார். அப்போது வேட்பாளர்களுக்குத் தனது வாழ்த்துகளைத் தெரிவித்த அவர், தொடர்ந்து நடைபெற்ற ஆலோசனைக் கூட்டத்தில் கட்சியின் சட்டமன்றக் குழுத் தலைவராக ஒருமனதாகத் தேர்வு செய்யப்பட்டார்.

தற்போது ஆட்சிக் கட்டிலில் அமருவதற்கான அடுத்தகட்ட நடவடிக்கைகளை த.வெ.க. தீவிரமாக எடுத்து வருகிறது. இந்தக் கட்சியின் வெற்றிக்கு, அவர்கள் வெளியிட்ட தேர்தல் அறிக்கை முக்கியப் பங்காற்றியதாகக் கருதப்படுகிறது. எனவே, விஜய் முதலமைச்சராகப் பொறுப்பேற்றதும், தேர்தல் வாக்குறுதிகளில் எதற்கு முன்னுரிமை அளித்துத் தனது முதல் கையெழுத்தைப் போடுவார் என்ற எதிர்பார்ப்பு மக்கள் மத்தியில் எழுந்துள்ளது.

மகளிர் நலன் மற்றும் குடும்பப் பாதுகாப்பு:

• மாதாந்திர உதவித்தொகை: ஒவ்வொரு குடும்பத் தலைவிக்கும் 60 வயது வரை மாதம் ரூ.2,500 வங்கிக் கணக்கில் வரவு வைக்கப்படும்.

• இலவச எரிவாயு: ஆண்டுக்கு 6 காஸ் சிலிண்டர்கள் வாங்குவதற்கான தொகை நேரடியாக வங்கிக் கணக்கில் செலுத்தப்படும்.

• இலவசப் பேருந்து பயணம்: மாநிலம் முழுவதும் அரசுப் பேருந்துகளில் மகளிருக்குக் கட்டணமில்லாப் பயணம் (வெற்றிப் பயணம் திட்டம்).

• திருமண உதவி: ஆண்டு வருமானம் ரூ.5 லட்சத்திற்குக் குறைவாக உள்ள குடும்பங்களுக்கு, திருமணத்தின் போது மணப்பெண்ணுக்கு 8 கிராம் தங்கம் மற்றும் பட்டுச்சேலை வழங்கப்படும்.

• தாய்மாமன் சீர்: அரசு மருத்துவமனைகளில் பிறக்கும் குழந்தைகளுக்குத் தங்க மோதிரம் மற்றும் அத்தியாவசியப் பொருட்கள் அடங்கிய 'தாய்மாமன் சீர் பெட்டகம்' வழங்கப்படும்.

கல்வி மற்றும் உள்கட்டமைப்பு:

• கல்வி ஊக்கத்தொகை: 1 முதல் 12-ஆம் வகுப்பு வரை பயிலும் மாணவர்களின் தாய்மார்களுக்கு ஆண்டுக்கு ரூ.15,000 (இரு தவணைகளில்) வழங்கப்படும்.

• இலவச மின்சாரம்: தகுதியுள்ள வீடுகளுக்கு மாதம் 200 யூனிட் மின்சாரம் இலவசம்.

• வீட்டு வசதி: கிராமப்புற ஏழைகளுக்காக 5 லட்சம் புதிய வீடுகள் கட்டித் தரப்படும்.

• ரேஷன் சீர்திருத்தம்: தரமான பொருட்கள் கிடைப்பதை உறுதி செய்ய, அரிசி தவிர மற்ற பொருட்கள் பாக்கெட்டுகளில் விநியோகிக்கப்படும். 500 கார்டுகளுக்கு ஒரு ரேஷன் கடை அமைக்கப்படும்.

• கல்வி உரிமை: கல்வியைப் பொதுப் பட்டியலில் இருந்து மாநிலப் பட்டியலுக்கு மாற்ற நடவடிக்கை எடுக்கப்படும்.

விவசாயம் மற்றும் சமூக பாதுகாப்பு:

• விவசாயிகள் நலன்: நெல்லுக்கு குவிண்டாலுக்கு ரூ.3,500-ம், கரும்புக்கு டன் ஒன்றுக்கு ரூ.4,500-ம் குறைந்தபட்ச ஆதார விலையாக வழங்கப்படும்.

• இலவச உயர்கல்வி: 2 ஏக்கருக்குக் குறைவாக நிலம் வைத்துள்ள விவசாயிகளின் குழந்தைகளுக்குக் கட்டணமில்லா உயர்கல்வி வழங்கப்படும்.

• கால்நடை வளர்ப்பு: 2 லட்சம் குடும்பங்களுக்குக் கறவை மாடுகள் மற்றும் ஆடுகள் இலவசமாக வழங்கப்படும்.

• போதைப்பொருள் ஒழிப்பு: முதலமைச்சரின் நேரடி கண்காணிப்பில் தனிப்படை உருவாக்கப்பட்டு போதைப்பொருள் புழக்கம் அறவே நீக்கப்படும்.

முன்னுரிமை எதற்கு?

பெரும்பாலும் மகளிர் நலன் சார்ந்த அறிவிப்புகளுக்கே விஜய் முன்னுரிமை அளிப்பார் என்று கட்சி வட்டாரங்கள் தெரிவிக்கின்றன. குறிப்பாக, மாதம் ரூ.2,500 வழங்கும் திட்டமோ அல்லது போதைப்பொருள் தடுப்பு நடவடிக்கையோ அவரது முதல் கையெழுத்தாக இருக்க வாய்ப்புள்ளது. அதே சமயம், தேர்தல் அறிக்கையில் இல்லாத அதிரடி அறிவிப்பு ஒன்றையும் அவர் வெளியிட வாய்ப்புள்ளதாகக் கூறப்படுகிறது.

மக்கள் கருத்து

மக்கள் பதிவு செய்யும் கருத்துகள் தணிக்கையின்றி பிரசுரமாகும் வகையில் மென்பொருள் வடிவமைக்கப்பட்டுள்ளது. தொழில்நுட்ப குறைபாடுகள் காரணமாக கருத்துக்கள் பதிவாவதில் சிறிது காலதாமதம் ஏற்பட வாய்ப்புள்ளது. வாசகர்களின் கருத்துக்களுக்கு நிர்வாகம் பொறுப்பாக மாட்டார்கள். நாகரீகமற்ற மற்றும் பிறர் மனதை புண்படுத்தகூடிய கருத்துகளை / வார்த்தைகளைப் பயன்படுத்துவதை தவிர்க்கும்படி கேட்டுக்கொள்கிறோம்.

ஆங்கிலத்தில் தட்டச்சு செய்ய Ctrl+G -ஐ அழுத்தவும்.

பெயர்: கருத்து:

முதல்வர் விஜய்யின் முதல் கையெழுத்து எது? - த.வெ.க. தேர்தல் அறிக்கையை எதிர்நோக்கும் தமிழகம்!

» செய்திகள் - விளையாட்டு » தமிழகம்