தூத்துக்குடியில் நள்ளிரவில் புகையை வெளியேற்றும் தொழிற்சாலைகள் : பொதுமக்கள் கடும் அவதி

தூத்துக்குடியில் நள்ளிரவில் தொழிற்சாலைகள் வெளியேற்றும் புகை காரணமாக பொதுமக்கள் அவதியுற்று வருகின்றனர். 

துறைமுக நகரான தூத்துக்குடியில் பல்வேறு தொழிற்சாலைகள் அமைந்துள்ளன. இந்த நிலையில் கடந்த சில தினங்களாக தொழிற்சாலைகளில் இருந்து நள்ளிரவில் அதிகளவில் புகை வெளியேற்றப்படுவதாக புகார் எழுந்துள்ளது. 

குறிப்பாக நகரின் மேற்கு பகுதிகளான கோரம்பள்ளம், இபி காலனி, மாதவன் நகர், மடத்தூர், சோரீஸ்புரம், பி அன் டி காலனி, திரவிய ரத்ன நகர், கதிர்வேல் நகர், அசோக் நகர், பாக்கியலட்சுமி நகர், பால்பாண்டி நகர், மில்லர்புரம், அண்ணா நகர், டிஎம்பி காலனி உள்ளிட்ட பகுதிகளில் வசிக்கும் மக்கள் மூச்சுத் தினறால் பாதிக்கப்பட்டுள்ளதாக தகவல் வெளியாகி உள்ளது. 

மேலும், வாகன ஓட்டிகள் பெரும் சிரமத்துக்குள்ளாகின்றனர். குழந்தைகள், முதியவர்களுக்கு சுவாச பிரச்சினை, கண் எரிச்சல் உள்ளிட்டவை ஏற்படுகிறது. தொடர்ந்து வெளியேறும் புகையினால் சுற்றுச்சூழலும் பாதிக்கப்படுகிறது. எனவே பொதுமக்கள் மற்றும் சுற்றுச்சூழலுக்கு பாதிப்பை ஏற்படுத்தும் வகையில் புகையை வெளியேற்றும் தொழிற்சாலைகள் மீது அரசு உரிய நடவடிக்கை எடுக்க வேண்டும் என்று இப்பகுதி பொதுமக்கள் வலியுறுத்தியுள்ளனர்.