மாநில சுயாட்சி: முதல்வர் மு.க.ஸ்டாலின் முயற்சிக்கு கர்நாடக முதல்வர் சித்தராமையா ஆதரவு

மத்திய - மாநில உறவுகள் குறித்து மறுஆய்வு செய்து, மாநிலங்களுக்கு உரிய அதிகாரங்களைப் பெறத் தமிழக முதல்வர் மு.க.ஸ்டாலின் எடுத்து வரும் முயற்சிகளுக்குக் கர்நாடக முதல்வர் சித்தராமையா தனது முழு ஆதரவைத் தெரிவித்துள்ளார்.

மத்திய - மாநில உறவுகள் தொடர்பாகத் தமிழக அரசு அமைத்த உயர்நிலைக் குழுவின் முதற்கட்ட அறிக்கை அண்மையில் சமர்ப்பிக்கப்பட்டது. இது தொடர்பாக முதல்வர் மு.க.ஸ்டாலினுக்குச் சித்தராமையா எழுதியுள்ள கடிதத்தில் குறிப்பிட்டிருப்பதாவது: கூட்டாட்சி என்பது வெறும் அரசியல் கோரிக்கை அல்ல; அது நமது அரசியலமைப்பின் அடிப்படைச் சட்டக்கட்டமைப்பு.

நிதி மற்றும் சட்ட விவகாரங்களில் அதிகாரம் மத்திய அரசிடம் குவிக்கப்படுவது, அரசியலமைப்பை உருவாக்கியவர்கள் வகுத்த சமநிலையைச் சீர்குலைத்துள்ளது. மாநிலங்கள் தங்களுக்குரிய பொறுப்புகளை நிறைவேற்றப் போதுமான அதிகாரமும், நிதி சுதந்திரமும் அவசியம்.

மாநிலங்களுக்கு இடையேயான கவுன்சில்: அனைத்து மாநிலங்களும் ஒன்றிணைந்து விவாதிக்கவும், கூட்டாட்சிச் சமநிலையை மீட்டெடுக்கவும் 'மாநிலங்களுக்கு இடையேயான கவுன்சில்' (Inter-State Council) போன்ற வலுவான தளத்தை மத்திய அரசு அமைத்துத் தர வேண்டும். ஜனநாயக மற்றும் கூட்டாட்டுக் கட்டமைப்பை வலுப்படுத்தும் இத்தகைய முயற்சிகளில் கர்நாடக அரசு ஆக்கபூர்வமாகப் பங்களிக்கத் தயாராக உள்ளது என அவர் உறுதியளித்துள்ளார்.

சித்தராமையாவின் ஆதரவிற்கு நன்றி தெரிவித்து முதல்வர் மு.க.ஸ்டாலின் வெளியிட்டுள்ள சமூக வலைதளப் பதிவில்: "கூட்டாட்சி கருத்தியலைப் புதுப்பிக்கும் இந்த முயற்சி, ஒரு கூட்டு முயற்சியாக அமைய வேண்டும் எனத் தாங்கள் அங்கீகரித்திருப்பதைப் பாராட்டுகிறேன். பன்முகத்தன்மை கொண்ட இந்தியக் குடியரசின் ஒற்றுமையை ஒற்றைத்தன்மையால் நிலைக்கச் செய்ய முடியாது; அரசியலமைப்பின் வழியிலான நம்பகத்தன்மை மூலமே அதைச் செய்ய இயலும் எனத் தாங்கள் கூறிய கருத்து மிகச் சரியானது" எனக் குறிப்பிட்டுள்ளார்.