உலகக் கோப்பை கால்பந்து: அமெரிக்காவை 3-2 என்ற கோல் கணக்கில் வீழ்த்தி துருக்கி த்ரில் வெற்றி!

உலகக் கோப்பை கால்பந்து தொடரின் 'டி' பிரிவு லீக் ஆட்டத்தில் அமெரிக்காவை 3-2 என்ற கோல் கணக்கில் வீழ்த்தி துருக்கி அணி த்ரில் வெற்றி பெற்றுள்ளது.

அமெரிக்காவின் லாஸ் ஏஞ்சல்ஸ் நகரில் இந்திய நேரப்படி இன்று காலை 7:30 மணிக்குத் தொடங்கிய இப்போட்டியில், ஆட்டம் தொடங்கிய 3-வது நிமிடத்திலேயே அமெரிக்க வீரர் ஆஸ்டன் ட்ரஸ்டி முதல் கோலை அடித்துத் தனது அணியை 1-0 என முன்னிலை பெறச் செய்தார்.

இருப்பினும், அதிர்ச்சியில் இருந்து மீண்ட துருக்கி அணி 10-வது நிமிடத்தில் அதிரடியாகப் பதில் கோல் அடித்தது. அந்த அணியின் ஆர்தா குலர் இந்த சமனிலை கோலை அடித்தார். தொடர்ந்து தாக்குதல் ஆட்டத்தைத் தொடுத்த துருக்கி அணியின் ஓர்குன் கோக்சு, 31-வது நிமிடத்தில் மற்றொரு கோல் அடித்து அணியை 2-1 என முன்னிலைக்குக் கொண்டு சென்றார். இதனால் முதல் பாதி ஆட்ட முடிவில் துருக்கி 2-1 என ஒரு கோல் முன்னிலையில் இருந்தது.

இரண்டாவது பாதியில் ஆட்டத்தைத் தீவிரப்படுத்திய அமெரிக்க அணிக்கு, செபாஸ்டியன் பெர்ஹால்டர் அடித்த கோல் மூலம் ஆட்டம் 2-2 என சமநிலைக்கு வந்தது. அதன் பிறகு இரு அணிகளும் வெற்றிக்கான கோலை அடிக்கக் கடுமையாகப் போராடின.

ஆட்டம் சமனில் முடிவடையும் என்று எதிர்பார்க்கப்பட்ட நிலையில், போட்டியின் இறுதி நிமிடத்தில் துருக்கி வீரர் கான் அய்ஹான் அதிரடியாக ஒரு கோல் அடித்துத் தனது அணியின் வெற்றியை உறுதி செய்தார். இறுதியில், விறுவிறுப்பாக நடைபெற்ற இந்த லீக் ஆட்டத்தில் 3-2 என்ற கோல் கணக்கில் அமெரிக்காவை வீழ்த்தி துருக்கி திரில் வெற்றி பெற்றது.