தூத்துக்குடி பிரதான சாலையில் கூடுதல் டாஸ்மாக் கடைகள் திறப்பு: போராட்டம் நடத்த பாஜக முடிவு!

தூத்துக்குடி நகரின் பிரதான சாலைப் பகுதிகளில் கூடுதலாக டாஸ்மாக் கடைகள் திறக்கப்பட்டுள்ளதை எதிர்த்துப் போராட்டம் நடத்தப்படும் என்று பாரதிய ஜனதா கட்சியின் சார்பில் அறிவிக்கப்பட்டுள்ளது. 

தமிழக அரசு மதுபானக் கடைகளை மூடுவதாக அறிவித்ததன் தொடர்ச்சியாகத் தூத்துக்குடி மாவட்டத்தில் 63 கடைகள் மூடப்பட உள்ளதாகத் தெரிவிக்கப்பட்டிருந்தது. எனினும், தூத்துக்குடி எட்டயபுரம் சாலை மற்றும் குறிஞ்சி நகர் மெயின் ரோடு, கலைஞர் அரங்கம் அருகில் ஏற்கனவே செயல்பட்டு வந்த ஒரு டாஸ்மாக் கடையின் அருகிலேயே கூடுதலாக இரண்டு புதிய கடைகள் திறக்கப்பட்டுள்ளதாகப் பாஜக தெற்கு மாவட்டத் தலைவர் சித்ராங்கதன் குறிப்பிட்டுள்ளார்.

கூடுதல் கடைகள் திறப்பு காரணமாகப் பொதுமக்களிடையே பாதுகாப்பு அச்சம் நிலவுவதாகவும், பெண்கள், குழந்தைகள் மற்றும் பள்ளி மாணவர்கள் அதிகளவில் பயன்படுத்தும் இப்பிரதான சாலையில் மது அருந்துவோரின் நடமாட்டம் அதிகரித்துள்ளதாகவும் அறிக்கையில் சுட்டிக்காட்டப்பட்டுள்ளது. மேலும், முந்தைய திமுக ஆட்சியின் தொடர்ச்சியாகத் தற்போதைய தவெக அரசும் இதே போன்ற உள்கட்டமைப்பு நடைமுறைகளைப் பின்பற்றுவதாக விமர்சித்துள்ளார்.

மாவட்ட நிர்வாகம் இந்த விவகாரத்தில் தலையிட்டு இப்பகுதியில் புதிதாகத் திறக்கப்பட்டுள்ள கடைகளை மூடுவதற்குரிய சட்டப்படியான நடவடிக்கைகளை மேற்கொள்ள வேண்டும் என்றும், தவறும் பட்சத்தில் பாரதிய ஜனதா கட்சியின் சார்பில் கண்டன ஆர்ப்பாட்டம் நடத்தப்படும் என்றும் தெரிவித்துள்ளார்.