செந்தூர் எக்ஸ்பிரஸ் ரயிலில் கூடுதலாக 5 பெட்டிகள் இணைப்பு: ஜூன் 15 முதல் அமல்!

பயணிகளிடம் அமோக வரவேற்பு பெற்றுள்ள சென்னை எழும்பூர் - திருச்செந்தூர் 'செந்தூர் சூப்பர் பாஸ்ட் எக்ஸ்பிரஸ்' ரயிலில், பயணிகள் கூட்ட நெரிசலைக் குறைக்கும் பொருட்டு ஜூன் 15-ஆம் தேதி முதல் நிரந்தரமாக 5 கூடுதல் பெட்டிகள் இணைக்கப்பட உள்ளன.

செந்தூர் எக்ஸ்பிரஸ் கடந்த 2009-ஆம் ஆண்டு வார ரயிலாக அறிமுகப்படுத்தப்பட்டு, பின்னர் 2012-ல் தினசரி ரயிலாக மாற்றப்பட்டது. இந்த ரயில் விழுப்புரம், சிதம்பரம், கடலூர், மயிலாடுதுறை, தஞ்சாவூர் வழியாகத் திருச்சி சென்று அங்கிருந்து திருச்செந்தூர் செல்வதால் இப்பகுதி மக்களிடம் பெரும் வரவேற்பைப் பெற்றது. கடந்த 2023 முதல் இது சூப்பர் பாஸ்ட் ரயிலாக மாற்றப்பட்டு வேகமும் அதிகரிக்கப்பட்டது.

தற்போது இந்த ரயிலில் காத்திருப்போர் பட்டியல் நீண்டு கொண்டே செல்வதால், ரயிலின் மொத்த பெட்டிகளின் எண்ணிக்கையை 18-லிருந்து 23 ஆக உயர்த்த தெற்கு ரயில்வே முடிவு செய்துள்ளது. வரும் ஜூன் 15-ஆம் தேதி முதல் சென்னையில் இருந்தும், ஜூன் 16-ஆம் தேதி முதல் திருச்செந்தூரில் இருந்தும் 3 இரண்டாம் வகுப்பு தூங்கும் வசதி பெட்டிகளும் (Sleeper Class), 2 மூன்றாம் வகுப்பு ஏசி பெட்டிகளும் (3-Tier AC) நிரந்தரமாக இணைக்கப்படுகின்றன.

இந்த புதிய பெட்டிகள் இணைப்பின் மூலம் நாளொன்றுக்கு 400 பயணிகள் வரை கூடுதலாக முன்பதிவு செய்து பயணிக்க முடியும். இதனால் காத்திருப்போர் பட்டியலில் உள்ள பயணிகளுக்கு எளிதில் டிக்கெட் கிடைக்க வாய்ப்புள்ளது. தெற்கு ரயில்வேயின் இந்த அதிரடி முடிவுக்குப் பயணிகள் சங்கத்தினர் வரவேற்பு தெரிவித்துள்ளனர்.