சட்டமன்றத்தில் பெரும்பான்மையை நிரூபிக்கத் தயார் : ஆளுநரை மீண்டும் சந்தித்து விஜய் உரிமை கோரல்!

தமிழகத்தில் தனிப்பெரும் கட்சியான தங்களை ஆட்சி அமைக்க அழைக்க வேண்டும் என்று கோரி தமிழக வெற்றிக் கழகத் தலைவர் விஜய் இன்று மீண்டும் ஆளுநர் ராஜேந்திர விஸ்வநாத் அர்லேகரைச் சந்தித்துப் பேசினார்.

புதன்கிழமை அன்று ஆளுநரைச் சந்தித்து விஜய் ஆட்சி அமைக்க உரிமை கோரியிருந்தார். அப்போது, அறுதிப் பெரும்பான்மைக்குத் தேவையான 118 இடங்களுக்கான ஆதரவுப் பட்டியலைச் சமர்ப்பிக்க ஆளுநர் மாளிகை அறிவுறுத்தியது. இந்நிலையில், இன்று (வியாழக்கிழமை) இரண்டாவது முறையாக ஆளுநரைச் சந்தித்த விஜய், "சட்டப்பேரவையிலேயே எங்களது பெரும்பான்மையை நிரூபிப்போம், எனவே எங்களை ஆட்சி அமைக்க அழைக்க வேண்டும்" என வலியுறுத்தினார்.

நடந்து முடிந்த சட்டப்பேரவைத் தேர்தலில் தவெக 108 இடங்களில் வெற்றி பெற்று தனிப்பெரும் கட்சியாக உருவெடுத்தது.

திமுக கூட்டணியில் இருந்து விலகிய காங்கிரஸ் கட்சியின் 5 எம்.எல்.ஏ-க்கள் தவெக-விற்குத் தங்களது ஆதரவை அளித்துள்ளனர்.

இதன் மூலம் தவெக-வின் பலம் 113-ஆக உயர்ந்துள்ளது. இருப்பினும், பெரும்பான்மையை நிரூபிக்க இன்னும் 5 இடங்கள் (118) தேவைப்படுகிறது.

தேவையான மீதமுள்ள இடங்களுக்காக இடதுசாரி கட்சிகள் (தலா 2 இடங்கள்) மற்றும் விடுதலைச் சிறுத்தைகள் கட்சி (2 இடங்கள்) ஆகியவற்றுடன் தவெக தரப்பு தீவிரமாகப் பேச்சுவார்த்தை நடத்தி வருகிறது. ஆதரவு கடிதங்கள் முழுமையாகத் திரட்டப்படாததால், இன்று நடைபெறவிருந்த பதவியேற்பு விழா தள்ளிப்போயுள்ளது.

சட்டமன்றத்தில் பெரும்பான்மையை நிரூபிக்கத் தயார் என விஜய் தரப்பு உறுதியாகத் தெரிவித்துள்ள நிலையில், ஆளுநரின் அடுத்தகட்ட நடவடிக்கை என்னவாக இருக்கும் என்பது தமிழக அரசியலில் பெரும் எதிர்பார்ப்பை ஏற்படுத்தியுள்ளது.