பயணத்தைத் தொடர்வோம். மீண்டும் வெல்வோம் - தொண்டர்களுக்கு மு.க. ஸ்டாலின் கடிதம்!

தந்தை பெரியார், பேரறிஞர் அண்ணா, தமிழினத் தலைவர் கலைஞர் வழித்தடத்தில் இனம், மொழி மற்றும் நாடு காக்கும் பயணத்தைத் தொடர்வோம். மீண்டும் வெல்வோம்! என திமுக தலைவர் மு.க. ஸ்டாலின் தெரிவித்துள்ளார்.

தமிழகச் சட்டமன்றத் தேர்தல் முடிவுகள் வெளியானதைத் தொடர்ந்து, திமுக தலைவர் மு.க. ஸ்டாலின் அவர்கள் தொண்டர்களுக்கும் தமிழக மக்களுக்கும் நன்றி தெரிவித்து அறிக்கை வெளியிட்டுள்ளார். 

அதன் விவரம் பின்வருமாறு: நடந்து முடிந்த தமிழ்நாடு சட்டமன்றப் பொதுத் தேர்தலில் திராவிட முன்னேற்றக் கழகத்தின் தலைமையிலான மதச்சார்பற்ற முற்போக்குக் கூட்டணிக் கட்சியின் வேட்பாளர்களுக்கு வாக்களித்த தமிழ்நாட்டு மக்கள் அனைவருக்கும் எனது மனமார்ந்த நன்றியை உண்மை உணர்வுடன் தெரிவித்துக் கொள்கிறேன். உங்கள் அனைவரின் ஒவ்வொரு வாக்கையும் விலைமதிப்பற்ற நம்பிக்கையாக நான் கருதுகிறேன்.

இப்போது வரை கிடைத்துள்ள புள்ளிவிவரங்களின்படி, திமுக கூட்டணிக்கு 1 கோடியே 54 லட்சத்து 82 ஆயிரத்து 782 வாக்குகள் கிடைத்துள்ளன.

நம்மை விடக் கூடுதல் தொகுதிகளில் வெற்றி பெற்ற கட்சியானது, வெறும் 17.43 லட்சம் வாக்குகளை மட்டுமே கூடுதலாகப் பெற்றுள்ளது.

நமக்கும் அவர்களுக்குமான வாக்கு விழுக்காடு வேறுபாடு என்பது வெறும் 3.52% மட்டுமே.

இதன் மூலம் தமிழ்நாட்டு மக்கள் நம் மீது வைத்துள்ள நம்பிக்கை மிகவும் வலிமையானது என்பதை நான் உணர்கிறேன்.

"மக்களாட்சியில் மக்களே நம் வணக்கத்திற்குரியவர்கள்" என்று குறிப்பிட்டுள்ள அவர், வெற்றி பெற்ற வேட்பாளர்கள் அனைவரும் உடனடியாகத் தொகுதிக்குச் சென்று வாக்களித்த மக்களைச் சந்தித்து நன்றி தெரிவிக்க வேண்டும் என்று கேட்டுக்கொண்டுள்ளார்.

தோல்வியால் துவண்டு போயுள்ள உடன்பிறப்புகளுக்குத் தைரியம் அளிக்கும் வகையில் அவர் கூறியிருப்பதாவது: "திமுக ஆறு முறை ஆட்சியில் இருந்துள்ளது. நாம் பார்க்காத வெற்றியும் இல்லை; சந்திக்காத தோல்வியும் இல்லை. வெற்றியாக இருந்தாலும், தோல்வியாக இருந்தாலும் அதனைச் சமமாகக் கருதி இலட்சியப் பயணத்தை நடத்துபவர்கள்தான் கழக உடன்பிறப்புகள். எனக்கு ஆறுதல் சொல்லி குறுஞ்செய்தி அனுப்பும் உடன்பிறப்புகளே... நீங்கள் உடனிருக்கும் வரை எனக்கு என்ன கவலை? நாம் அனைவரும் தலைவர் கலைஞரின் உயிரினும் மேலான அன்பு உடன்பிறப்புகள்."

தமது அறிக்கையின் இறுதியில் எதிர்காலத் திட்டத்தைப் பற்றி அவர் குறிப்பிடுகையில்: ஆளும் கட்சியாக இருந்தால் மக்களுக்கான திட்டங்களைத் தீட்டுவோம்.எதிர்க்கட்சியாக இருந்தால் மக்களுக்கான கோரிக்கைகளுக்காகப் போராடுவோம்.

அந்த வகையில், தற்போது வலிமையான எதிர்க்கட்சியாக இருந்து மக்களுக்கான அரசியலை நாம் தொடர்வோம். தந்தை பெரியார், பேரறிஞர் அண்ணா, தமிழினத் தலைவர் கலைஞர் வழித்தடத்தில் இனம், மொழி மற்றும் நாடு காக்கும் பயணத்தைத் தொடர்வோம். மீண்டும் வெல்வோம்! என மு.க. ஸ்டாலின் உறுதிபடத் தெரிவித்துள்ளார்.