சேப்பாக்கம்-திருவல்லிக்கேணியில் உதயநிதி ஸ்டாலின் கடும் போராட்டத்திற்குப் பின் வெற்றி!

தமிழகமே ஆவலோடு எதிர்பார்த்த 2026 சட்டமன்றத் தேர்தல் முடிவுகள் இன்று வெளியாகின. இதில் சென்னையின் இதயமாகக் கருதப்படும் 'சேப்பாக்கம்-திருவல்லிக்கேணி' தொகுதியின் முடிவுகள் என்னவாக இருக்கும் என்பதே தொடக்கம் முதலே அரசியல் வட்டாரத்தின் 'ஹாட் டாபிக்' ஆக இருந்தது. அதற்குக் காரணம், துணை முதலமைச்சர் உதயநிதி ஸ்டாலின் மீண்டும் இங்கு களம் கண்டதுதான்.

சேப்பாக்கம்-திருவல்லிக்கேணி தொகுதி எப்போதும் திமுகவின் அசைக்க முடியாத கோட்டையாகவே இருந்து வருகிறது. மறைந்த முன்னாள் முதல்வர் கருணாநிதி பலமுறை வென்ற தொகுதி இது.

• 2011: திமுகவின் ஜெ. அன்பழகன் 9,203 வாக்குகள் வித்தியாசத்தில் வெற்றி பெற்றார்.

• 2016: மீண்டும் ஜெ. அன்பழகன் 14,164 வாக்குகள் வித்தியாசத்தில் அதிமுகவின் நூர்ஜகானை வீழ்த்தினார்.

• 2021: ஜெ. அன்பழகன் மறைவிற்குப் பின் முதன்முறையாகக் களம் இறங்கிய உதயநிதி ஸ்டாலின், பாமகவின் கசாலியை 69,355 வாக்குகள் என்ற இமாலய வித்தியாசத்தில் தோற்கடித்தார்.

இந்த முறை இத்தொகுதியில் மொத்தமுள்ள 2,34,500 வாக்காளர்களில், வியக்கத்தக்க வகையில் 78.4% வாக்குப்பதிவு நடைபெற்றது. 2021-ல் வெறும் 58% ஆக இருந்த வாக்குப்பதிவு, இப்போது சுமார் 20% அதிகரித்தது அனைத்துக் கட்சிகளுக்கும் பெரும் எதிர்பார்ப்பையும் அதிர்வலைகளையும் ஏற்படுத்தியிருந்தது.

இந்தத் தேர்தலில் விஜய்யின் தமிழக வெற்றி கழகம் சார்பில் களம் இறங்கிய செல்வம் மற்றும் அதிமுக சார்பில் போட்டியிட்ட ஆதிராஜாராம் ஆகியோர் உதயநிதிக்குக் கடும் சவாலாக இருப்பார்கள் எனக் கருதப்பட்டது.

வாக்கு எண்ணிக்கை தொடங்கியபோது ஆரம்பத்தில் உதயநிதி ஸ்டாலின் முன்னிலை வகித்தார். ஆனால், முதல் சுற்று முடிவிலேயே நிலைமை தலைகீழாக மாறியது. தவெக வேட்பாளர் செல்வம் முன்னிலை பெறத் தொடங்க, உதயநிதி ஸ்டாலின் பின்னடைவைச் சந்தித்தார். நேரம் செல்லச் செல்ல பின்னடைவு அதிகரித்ததால் திமுக முகாமில் பதற்றம் நிலவியது. எனினும், இறுதிச் சுற்றுகளில் நிலைமை மீண்டும் மாறி, சுமார் 10,000 வாக்குகள் முன்னிலையை உதயநிதி எட்டினார்.

நீண்ட இழுபறிக்குப் பிறகு வெளியான அதிகாரப்பூர்வ முடிவுகள் பின்வருமாறு:

உதயநிதி ஸ்டாலின் திமுக 58,110

செல்வம் தவெக 48,330

ஆதிராஜாராம் அதிமுக 12,662

இதன் மூலம், தவெக வேட்பாளர் செல்வத்தை 9,780 வாக்குகள் வித்தியாசத்தில் வீழ்த்தி உதயநிதி ஸ்டாலின் வெற்றி பெற்றுள்ளார்.

சென்னையின் மற்ற தொகுதிகளைப் பொறுத்தவரை, துறைமுகம் தொகுதியில் திமுக வேட்பாளர் சேகர்பாபு வெற்றி பெற்றுள்ளார். இருப்பினும், ஒட்டுமொத்தமாக சென்னையில் உள்ள 16 தொகுதிகளில் திமுக 2 தொகுதிகளில் மட்டுமே வெற்றி பெற்றுள்ளது. அதே சமயம், மீதமுள்ள 14 தொகுதிகளிலும் தமிழக வெற்றி கழகம் (தவெக) தனது வெற்றியை உறுதி செய்துள்ளது அரசியல் களத்தில் பெரும் மாற்றமாகக் கருதப்படுகிறது.