பெண்களுக்கு எதிரான குற்றங்களில் ஒரே நாளில் 3 பேருக்குச் சிறை - நீதிமன்றம் அதிரடி தீர்ப்பு!

விளாத்திகுளம் அருகே உள்ள அருங்குளத்தைச் சேர்ந்த பொன்னுத்தாய் என்பவர் அளித்த புகாரின் பேரில், அதே பகுதியைச் சேர்ந்த மாரிசெல்வம் (44) என்பவர் மீது வழக்குப் பதிவு செய்யப்பட்டது. குடும்பத் தகராறில் பெண்ணை இழிவாகப் பேசியதுடன், உயிருக்கு அச்சுறுத்தல் விடுத்தது நீதிமன்றத்தில் நிரூபிக்கப்பட்டதையடுத்து, அவருக்கு 3 ஆண்டுகள் சிறை மற்றும் ரூ. 3,000 அபராதம் விதிக்கப்பட்டது.

கீழசெய்தலை பகுதியைச் சேர்ந்த ரெஸ்லின் அன்பு மேரி அளித்த புகாரின் பேரில், அதே பகுதியைச் சேர்ந்த வெள்ளதுரை என்பவர் மீது தமிழ்நாடு பெண்கள் வன்கொடுமை தடுப்புச் சட்டத்தின் கீழ் வழக்குப் பதிவு செய்யப்பட்டது. பொது இடத்தில் பெண்ணை இழிவாகப் பேசி கொலை மிரட்டல் விடுத்த குற்றத்திற்காக, இவருக்கு ஓராண்டு சிறை மற்றும் ரூ. 3,000 அபராதம் விதிக்கப்பட்டது.

சக்கம்மாள்புரம் பகுதியைச் சேர்ந்த முத்துமாரி அளித்த புகாரின் பேரில், அதே பகுதியைச் சேர்ந்த விஜயகுமார் என்பவர் மீது வழக்குப் பதிவு செய்யப்பட்டது. பெண்ணைத் தவறான நோக்கத்துடன் அணுகி அச்சுறுத்திய குற்றத்திற்காக, இவருக்கு 2 ஆண்டுகள் சிறை மற்றும் ரூ. 4,500 அபராதம் விதிக்கப்பட்டது. இந்த 3 முக்கிய வழக்குகளிலும் ஓட்டப்பிடாரம் நீதிமன்ற நீதிபதி  பாக்கியராஜ் நேற்று சனிக்கிழமை இறுதித் தீர்ப்பை வழங்கினார். 

பெண்கள் மீதான குற்றச்செயல்களில் ஈடுபடுபவர்களுக்கு கடுமையான தண்டனை வழங்கப்படும் என காவல்துறை எச்சரிக்கை விடுத்துள்ளது.