தேசிய ஜனநாயகக் கூட்டணிக்கு விஜய் வருவாரா? நயினார் நாகேந்திரன் விளக்கம்

தமிழக சட்டமன்றத் தேர்தல் நெருங்கி வரும் சூழலில், தேசிய ஜனநாயகக் கூட்டணியில் தமிழக வெற்றிக் கழகத்தை இணைப்பது குறித்த யூகங்களுக்குப் பாஜக தலைவர் நயினார் நாகேந்திரன் பதிலளித்துள்ளார்.

தமிழக வெற்றிக் கழகத் தலைவர் விஜய், வரும் தேர்தலில் பாஜக தலைமையிலான தேசிய ஜனநாயகக் கூட்டணியில் இணைய வாய்ப்புள்ளதாகக் கடந்த சில நாட்களாகத் தகவல்கள் பரவி வருகின்றன. இருப்பினும், இது தொடர்பாகத் தமிழக வெற்றிக் கழகம், அதிமுக அல்லது பாஜக ஆகிய கட்சிகளின் தரப்பிலிருந்து இதுவரை எவ்வித அதிகாரப்பூர்வ அறிவிப்பும் வெளியாகவில்லை.

இந்நிலையில், சென்னையில் செய்தியாளர்களைச் சந்தித்த நயினார் நாகேந்திரனிடம், "தேசிய ஜனநாயகக் கூட்டணிக்கு விஜய் வருவாரா? இது குறித்துப் பேச்சுவார்த்தை ஏதும் நடைபெறுகிறதா?" என்று கேள்வி எழுப்பப்பட்டது. அதற்கு அவர் அளித்த பதில் வருமாறு:"விஜய் டெல்லி செல்வது கரூர் சம்பவம் தொடர்பான விசாரணைக்கு ஆஜராவதற்காகவே தவிர, அதற்கும் கூட்டணிக் குறித்துப் பேசப்படுவதற்கும் எந்தத் தொடர்பும் கிடையாது. கூட்டணிக்கு விஜய் வர வேண்டும் என நாங்கள் விரும்புகிறோமா என்ற கேள்விக்கு நான் இப்போது பதில் சொல்ல முடியாது. 

சிபிஐ மூலம் மிரட்டி விஜய்யைத் தேசிய ஜனநாயகக் கூட்டணிக்கு வர வைப்பதாக எதிர்க்கட்சிகள் திட்டமிட்டுப் பொய் பரப்பி வருகின்றன. அவர் கூட்டணிக்கு வருவாரா என்பது குறித்து எனக்குத் தற்போது ஏதும் தெரியாது." இவ்வாறு நயினார் நாகேந்திரன் தெரிவித்தார். விஜய்யின் டெல்லி பயணம் குறித்த அவரது இந்தப் பதில், அரசியல் வட்டாரத்தில் நிலவி வந்த தேவையற்ற யூகங்களுக்கு முற்றுப்புள்ளி வைக்கும் விதமாக அமைந்துள்ளது.