தூத்துக்குடியில் மழைநீர் தேங்கும் விவகாரம் : திமுக - அதிமுக கவுன்சிலர்கள் வாக்குவாதம்!

தூத்துக்குடியில் மழைநீர் தேங்காது என்று மாநகராட்சி நிர்வாகம் ஏமாற்று வேலை செய்வதாக அதிமுக கவுன்சிலர்கள் குற்றம்சாட்டினர். இதற்கு மேயர் ஜெகன் பெரியசாமி விளக்கம் அளித்துள்ளார். 

கூட்டத்தில் தீர்மானம் வாசிக்க ஆரம்பித்தவுடன் அ.தி.மு.க. எதிர்க்கட்சித் தலைவர் வழக்கறிஞர் வீரபாகு எழுந்து "மேயர் அவர்களே தற்போது பெய்து வரும் மழையால் காவலாளி ஒருவர் ரோட்டில் நடந்து செல்லும் போது பள்ளத்தில் விழுந்ததில் மின்சாரம் தாக்கி பரிதாபமாக இறந்தார். ரோடுகளில் ஆங்காங்கே வெள்ளம் போல் மழை நீர் தேங்கி கிடைக்கிறது. இதை அகற்றுவதற்கு நடவடிக்கை எடுக்க வேண்டும் என்றார். 

அப்போது திமுக கவுன்சிலர்கள் சுரேஷ்குமார், ராமகிருஷ்ணன், ரெஸ்கிலின் ஆகியோர் ஆட்சேபனை தெரிவித்தனர். இதற்கு அதிமுக கவுன்சிலர்கள் ஒட்டுமொத்தமாக எழுந்து எதிர்ப்பு தெரிவித்ததால் கூட்டத்தில் சிறிது நேரம் கூச்சல் குழப்பம் ஏற்பட்டது. உடனடியாக மேயர் அனைவரையும் சமாதானப்படுத்தி தீர்மானம் வாசித்த பின்பு அனைவருக்கும் பேச வாய்ப்பளிக்கப்படும் என்று தெரிவித்தார். 

அதன் பின்பு தீர்மானம் வாசிக்கப்பட்டது. கூட்டத்தில் அ. தி.மு.க கொறடா வழக்கறிஞர் மந்திரமூர்த்தி பேசும் போது தூத்துக்குடியில் பெய்து வரும் மழையால் நீதிமன்றம், சி.வ. பள்ளி வளாகங்களில் குளம் போல் மழைநீர் தேங்கியுள்ளது. இவற்றை அகற்ற நடவடிக்கை எடுக்க வேண்டும். மேலும் தூத்துக்குடியில் மல்டி ஸ்பெஷாலிட்டி மருத்துவமனை மகப்பேறு மருத்துவமனையாக மாற்றப்பட்டுள்ளது. கடந்த ஆண்டு மழை பெய்த போது தற்போது இங்கு தேங்கும் தண்ணீர் அடுத்த ஆண்டு தேங்காது என்று உறுதி அளித்தீர்கள் ஆனால் இந்த ஆண்டும் அதே இடங்களில் தான் மழை நீரில் தேங்கியுள்ளது இதுவும் மக்களை ஏமாற்றும் வேலை என்று பேசினார்.

இதற்கு பதில் அளித்து பேசிய மேயர் ஜெகன் பெரியசாமி "நீதிமன்றம் பள்ளி வளாகம் மாநகராட்சி கண்ட்ரோல் கிடையாது இருந்தாலும் மாநகராட்சி பகுதியில் இருப்பதால் தண்ணீரை அகற்றுவதற்கு நடவடிக்கை எடுக்கப்படும். ஆஸ்பத்திரி விவகாரத்தில் மத்திய அரசுதான் முடிவு எடுக்க வேண்டும். மாநில அரசு கட்டுப்பாட்டில் கிடையாது. கடந்த ஆண்டு மழை பெய்த போது வடிகால் அமைக்கப்பட்டு தண்ணீர்கள் கடலுக்கு செல்லும் வகையில் 32 வழித்தடங்கள் ஏற்படுத்தப்பட்டது. தற்போது 35 இடங்களில் மின் மோட்டார்கள் வைத்து தண்ணீர் அகற்றப்பட்டு வருகிறது. மருத்துவமனை விவகாரத்தில் தமிழக அரசு நடவடிக்கை எடுக்கும் என்றார். 

கூட்டத்தில் தூத்துக்குடி மாநகராட்சியில் குடிநீர் வழங்கல், பாதாள சாக்கடை, சுகாதாரம், தெருவிளக்குகள், திடக்கழிவு மேலாண்மை, சாலை, வரிகள், வர்த்தக உரிமம் தொடர்பான புகார்களை சரி செய்வதற்கான காலக்கெடுவை குறிக்கும் மக்கள் சாசனத்தை தயார் செய்து வெளியிட வேண்டும் என்று நகராட்சி நிர்வாக இயக்குநர் கேட்டுக்கொண்ட தீர்மானம் உள்பட 17 தீர்மானங்கள் ஒருமனதாக நிறைவேற்றப்பட்டது.