மக்களவை மாண்பைக் காப்பதில் ஓம் பிர்லா உறுதி: சபாநாயகருக்குப் பிரதமர் மோடி பாராட்டு!

மக்களவை சபாநாயகர் ஓம் பிர்லாவுக்கு எதிராகக் எதிர்க்கட்சிகள் கொண்டு வந்த நம்பிக்கையில்லாத் தீர்மானம் தோற்கடிக்கப்பட்ட நிலையில், சபாநாயகரின் 'அர்ப்பணிப்பு, பொறுமை மற்றும் நடுநிலைமை' ஆகியவற்றைப் பாராட்டி பிரதமர் நரேந்திர மோடி கடிதம் எழுதியுள்ளார்.

இது குறித்துப் பிரதமர் மோடி தனது கடிதத்தில் கூறியதாவது: "நம்பிக்கையில்லாத் தீர்மானம் தோற்கடிக்கப்பட்ட பிறகு, அவையில் நீங்கள் ஆற்றிய உரையை நான் கவனமாகக் கேட்டேன். நாடாளுமன்ற வரலாறு, அவையின் பொறுப்புகள் மற்றும் விதிகளின் மேலாதிக்கம் ஆகியவற்றை நீங்கள் கையாண்ட விதம் மிகவும் ஈர்க்கக்கூடியதாக இருந்தது. இதற்காக உங்களை நான் பாராட்டுகிறேன்."

கருத்து வேறுபாடுகள் ஜனநாயகத்தில் இயல்பானவை என்று குறிப்பிட்ட பிரதமர், ஆனால் அரசியல் வேறுபாடுகள் நாடாளுமன்றத்தின் கண்ணியத்தை அவமதிக்கும் வகையில் மாறுவது கவலைக்குரியது என்றார்.

கண்ணியம் காத்தல்: "சவாலான தருணங்களில் இருக்கையில் அமர்ந்திருப்பவர் சோதிக்கப்படுகிறார். நீங்கள் காட்டிய நிதானமும், நடுநிலைமையும் பாராட்டுக்குரியது."

பரம்பரை அரசியல் மனநிலை: "வாரிசு அரசியல் மற்றும் நிலப்பிரபுத்துவ மனநிலை கொண்ட சிலர், புதியவர்கள் முன்னேறுவதையோ அல்லது இளம் எம்.பி.க்கள் பேசுவதையோ எளிதில் ஏற்றுக்கொள்வதில்லை. ஆனால் உங்கள் பதவிக்காலத்தில், சமூகத்தின் அனைத்துத் தரப்பு குரல்களுக்கும் சமமான வாய்ப்பு வழங்கப்பட்டுள்ளது," என்று பிரதமர் புகழாரம் சூட்டினார்.

சபாநாயகர் ஓம் பிர்லா பதில்: பிரதமரின் கடிதத்தைப் பகிர்ந்துள்ள சபாநாயகர் ஓம் பிர்லா, பிரதமரின் இந்தச் செய்தி நாடாளுமன்றம் மற்றும் சட்டப்பேரவை உறுப்பினர்களுக்குப் பெரும் ஊக்கமாக அமையும் என்று தெரிவித்துள்ளார்.

மேலும், அனைத்து அரசியல் கட்சிகளுக்கும் அவர் விடுத்துள்ள கோரிக்கையில்: அவைக்குள்ளே பதாகைகள் மற்றும் அட்டைகளைக் காட்டுவது. கண்ணியமற்ற மொழியைப் பயன்படுத்துவது. தவறான நடத்தைகள் மூலம் நாடாளுமன்றத்தின் புகழைக் குலைப்பது. ஆகியவை ஆழ்ந்த கவலைக்குரியவை என்றும், நாடாளுமன்ற ஜனநாயகத்தின் மீதான மக்கள் நம்பிக்கையை வலுப்படுத்த அனைத்துக் கட்சிகளும் ஒன்றிணைய வேண்டும் என்றும் அவர் கேட்டுக்கொண்டுள்ளார்.