ரஞ்சி கோப்பை கிரிக்கெட்: சண்டிகாரை வீழ்த்தியது தமிழக அணி

ரஞ்சி கிரிக்கெட்டில் சேலத்தில் நடந்த ஆட்டத்தில் தமிழக அணி, சண்டிகாரை வீழ்த்தியது.

90-வது ரஞ்சி கோப்பை கிரிக்கெட் போட்டி பல்வேறு நகரங்களில் நடந்து வருகிறது. இதில் பங்கேற்றுள்ள 32 அணிகள் 4 பிரிவாக பிரிக்கப்பட்டு தங்களுக்குள் மோதுகின்றன. லீக் சுற்று முடிவில் ஒவ்வொரு பிரிவிலும் முதல் 2 இடங்களை பிடிக்கும் அணிகள் கால்இறுதிக்கு முன்னேறும்.

‘டி’ பிரிவில் இடம் பெற்றுள்ள தமிழக அணி தனது 6-வது லீக் ஆட்டத்தில் சண்டிகார் அணியுடன் மோதியது. சேலம் கிரிக்கெட் பவுண்டேசன் மைதானத்தில் தொடங்கிய இந்த ஆட்டத்தில் முதல் இன்னிங்சில் முறையே தமிழகம் 301 ரன்களும், சண்டிகார் 204 ரன்களும் எடுத்தன. 97 ரன் முன்னிலையுடன் 2-வது இன்னிங்சை ஆடிய தமிழக அணி 5 விக்கெட்டுக்கு 305 ரன்கள் சேர்த்து ‘டிக்ளேர்’ செய்தது. இதன் மூலம் சண்டிகாருக்கு 403 ரன் வெற்றி இலக்காக நிர்ணயிக்கப்பட்டது. 

இதை நோக்கி 2-வது இன்னிங்சில் பேட் செய்த சண்டிகார் 3-வது நாள் முடிவில் 5 விக்கெட்டுக்கு 113 ரன்கள் எடுத்திருந்தது. கேப்டன் மனன் வோரா (47 ரன்), விஷூ காஷ்யப் (4 ரன்) களத்தில் இருந்தனர். இந்த நிலையில் 4-வது மற்றும் கடைசி நாளான நேற்று தொடர்ந்து ஆடிய சண்டிகார் அணி 50 ஓவர்களில் 193 ரன்னில் ஆல்-அவுட் ஆனது. இதனால் தமிழக அணி 209 ரன்கள் வித்தியாசத்தில் வெற்றி பெற்றது. 

மனன் வோரா சதம் அடித்தும் (100 ரன்கள், 131 பந்து, 6 பவுண்டரி, 6 சிக்சர்) பலன் இல்லை. தமிழகம் தரப்பில் இடக்கை சுழற்பந்து வீச்சாளர்கள் சாய் கிஷோர், அஜித் ராம் தலா 4 விக்கெட்டுகளை அறுவடை செய்தனர். தமிழக அணி இதுவரை 6 ஆட்டங்களில் ஆடி 3 வெற்றி, 3 டிரா என 25 புள்ளிகளுடன் முதலிடம் வகிப்பதுடன் கால்இறுதியையும் வெகுவாக நெருங்கியுள்ளது. தமிழகம் தனது கடைசி லீக்கில் வருகிற 30-ந்தேதி ஜார்கண்ட் அணியை ஜாம்ஷெட்பூரில் எதிர்கொள்கிறது.

பாட்னாவில் நடந்த உத்தரபிரதேசத்துக்கு எதிரான ஆட்டத்தில் (சி பிரிவு) 355 ரன்கள் பின்தங்கிய நிலையில் 2-வது இன்னிங்சை ஆடிய பீகார் அணி 236 ரன்னில் அடங்கியது. இதனால் உத்தரபிரதேசம் இன்னிங்ஸ் மற்றும் 119 ரன்கள் வித்தியாசத்தில் வெற்றி பெற்றது.

மற்றொரு ஆட்டத்தில் மராட்டியம் 439 ரன்கள் வித்தியாசத்தில் (ஏ பிரிவு) பரோடாவை பதம் பார்த்தது.