தூத்துக்குடி அனல்மின் நிலைய ஒப்பந்தங்களுக்கு கமிஷனா? – சங்கப் பொருளாளர் மறுப்பு - முதல்வருக்கு கடிதம்!

தூத்துக்குடி அனல்மின் நிலைய ஒப்பந்தப் பணிகளில் எவ்வித கமிஷன் தொகையும் யாருக்கும் வழங்கப்படவில்லை என்று ஒப்பந்ததாரர்கள் சங்கப் பொருளாளர் ரா. பாலமுருகன் தமிழக முதலமைச்சருக்கு மனு அனுப்பியுள்ளார்.

தூத்துக்குடி அனல்மின் நிலைய (TTPS) ஒப்பந்தப் பணிகளில் எவ்வித கமிஷன் தொகையும் யாருக்கும் வழங்கப்படவில்லை என்றும், உண்மைக்குப் புறம்பான வதந்திகளால் முடங்கியுள்ள பணிகளை மீண்டும் துவங்க ஆணை பிறப்பித்துத் தொழிலாளர்களின் வாழ்வாதாரத்தைக் காக்க வேண்டும் என்றும் அனல்மின் நிலைய ஒப்பந்ததாரர்கள் சங்கப் பொருளாளர் ரா. பாலமுருகன் தமிழக முதலமைச்சருக்கு கோரிக்கை மனு ஒன்றை அனுப்பியுள்ளார்.

அந்த மனுவில் "தூத்துக்குடி அனல்மின் நிலையம் எம்.ஜி.ஆர் அவர்களால் துவங்கப்பட்டு, பின்னர் ஜெயலலிதா அவர்களால் கூடுதலாக இரண்டு அலகுகள் (Units) அமைக்கப்பட்டுச் சிறப்புடன் இயங்கி வருகிறது. பலதரப்பட்ட திறமையான உள்ளூர் ஒப்பந்ததாரர்கள் மற்றும் பணியாளர்களின் முறையான பராமரிப்பு உழைப்பால் மட்டுமே, இந்த அனல்மின் நிலையம் அதன் நிர்ணயிக்கப்பட்ட ஆயுட்காலத்தையும் தாண்டி 55 ஆண்டுகளைக் கடந்தும் தற்போதும் முழு உற்பத்தித் திறனுடன் மின்சாரத்தை வழங்கி வருகிறது.

கடந்த மே 25-ஆம் தேதி சென்னையில் மின்துறை அமைச்சர் நிர்மல்குமார் தலைமையில் மின்சார வாரிய ஒப்பந்ததாரர்களின் ஆலோசனைக் கூட்டம் நடைபெற்றது. இக்கூட்டத்திற்குப் பின், தூத்துக்குடி அனல்மின் நிலைய ஒப்பந்ததாரர்கள் சங்கச் செயலாளர் பா. ஹீராஜான் முந்தைய ஆட்சியாளர்கள் மற்றும் அதிகாரிகள் குறித்து வெளியிட்ட கருத்துக்கள் முற்றிலும் உண்மைக்குப் புறம்பானவை என்று மனுவில் சுட்டிக்காட்டப்பட்டுள்ளது.

அவருக்குத் தூத்துக்குடி அனல்மின் நிலையத்தில் தற்போதைய சூழலில் எந்த ஒப்பந்தப் பணியும் இல்லை என்றும், 3 ஆண்டுகளுக்கு முன்பு சென்னையில் நடைபெற்ற ஒரு பணிக்கான தனிப்பட்ட தொகைப்பட்டியல் (Bill) நிலுவை விவகாரத்தை அவர் பொதுவெளியில் தவறாகப் பேசியுள்ளார் என்றும், இதற்கும் தூத்துக்குடி அனல்மின் நிலைய ஒப்பந்ததாரர்கள் சங்கத்திற்கும் எவ்விதச் சம்பந்தமும் இல்லை என்றும் மனுவில் திட்டவட்டமாகத் தெளிவுபடுத்தப்பட்டுள்ளது.

ஒப்பந்தப் பணிகளின் போது ஏற்படும் எதிர்பாராத விபத்துகள் மற்றும் உயிரிழப்புகளுக்கு அரசிடமிருந்து உடனடி நிதி உதவி கிடைக்கப் பெறாத காலங்களில், சங்கத்தின் சார்பில் ஒப்பந்ததாரர்களிடம் வசூலிக்கப்படும் நல நிதியைக் கொண்டே பாதிக்கப்பட்ட குடும்பங்களுக்கு ரூ. 20 லட்சம் வரையிலான மருத்துவ மற்றும் இழப்பீட்டுத் தொகைகள் நிருவாக ரீதியாக வழங்கப்பட்டு வருகின்றன.

ஒப்பந்ததாரர்களுக்கான வருடாந்திரக் காப்பீடு மற்றும் பணியாளர்களுக்கான ஆண்டு முழு உடற்தகுதிப் பரிசோதனை ஆகிய செயல்பாடுகள் அனைத்தும் கடந்த 15 ஆண்டுகளாகச் சங்கத்தின் முறையான வங்கிப் பரிவர்த்தனைக் கணக்குகளின் மூலமாகவே வெளிப்படையாகத் தணிக்கை செய்யப்பட்டு வருகின்றன. எனவே, எந்தவொரு ஒப்பந்தப் பணிக்கும் எவ்விதச் செயலூக்கத் தொகையும் (கமிஷன்) யாருக்கும் வழங்கப்படவில்லை என்பது இதன் மூலம் நிரூபணமாகும் எனப் பொருளாளர் குறிப்பிட்டுள்ளார்.

தற்போது பரவியுள்ள தவறான வதந்திகளின் காரணமாக, அதிகாரிகள் எவ்வித ஒப்பந்தப் பணிகளையும் தொடரவிடாமல் தடுத்து நிறுத்தியுள்ளனர். இதனால் அவசரகாலத் தேவைக்காகத் துவங்கப்பட்ட பணிகள் அனைத்தும் தற்போது கிடப்பில் போடப்பட்டுள்ளன. 

இத்தகைய குழப்ப நிலை நீடித்தால் செயற்கையான மின் தட்டுப்பாடு ஏற்படும் அபாயம் உருவாகும் என்பதால், தமிழக முதலமைச்சர் இவ்விவகாரத்தில் நேரடியாகத் தலையிட்டு உண்மை நிலையை முழுமையாக விசாரித்து, நிறுத்தி வைக்கப்பட்டுள்ள பணிகளை மீண்டும் சுமுகமாகத் தொடங்க உரிய ஆணை வழங்கி தொழிலாளர்களின் வாழ்வாதாரத்தைப் பாதுகாக்க வேண்டும் என அந்த மனுவில் ரா. பாலமுருகன் கேட்டுக்கொண்டுள்ளார்.