த.வெ.க. ஆட்சியில் 15 நாட்களில் சட்டம்-ஒழுங்கு காலி: நயினார் நாகேந்திரன் விமர்சனம்!

தமிழகத்தில் த.வெ.க. ஆட்சி அமைந்த குறுகிய காலத்திற்குள்ளேயே சட்டம்-ஒழுங்கு முழுமையாகச் சீர்குலைந்துவிட்டதாக பா.ஜ.க. மாநிலத் தலைவர் நயினார் நாகேந்திரன் தெரிவித்துள்ளார்.  

தமிழகத்தில் த.வெ.க. ஆட்சி அமைந்த குறுகிய காலத்திற்குள்ளேயே சட்டம்-ஒழுங்கு முழுமையாகச் சீர்குலைந்துவிட்டதாகவும், மக்களின் அத்தியாவசியப் பிரச்சினைகளைக் கவனிக்காமல் முதலமைச்சர் விஜய் கோட்டைக்குள் ஒளிந்து கொள்வதாகவும் பா.ஜ.க. மாநிலத் தலைவர் நயினார் நாகேந்திரன் தனது சமூக ஊடகப் பக்கத்தில் மிகக் கடுமையான விமர்சனங்களை முன்வைத்துள்ளார்.

பா.ஜ.க. மாநிலத் தலைவர் நயினார் நாகேந்திரன் தனது எக்ஸ் (X) சமூக ஊடகத் தளப் பதிவில் தற்போதைய த.வெ.க. அரசு குறித்துக் கூறியிருப்பதாவது:  "கடந்த 2011-ஆம் ஆண்டிற்கு முந்தைய தி.மு.க.வின் கோரமான உள்கட்டமைப்பு ஆட்சியின் நேரடி நீட்சியாகவே தற்போதைய த.வெ.க.வின் புதிய ஆட்சி செயல்பட்டு வருகிறது. 

தமிழகத்தில் புதிய ஆட்சி அமைந்த வெறும் 15 நாட்களிலேயே மாநிலத்தின் பல்வேறு பிராந்தியங்களில் கொடூரக் குற்றச் சம்பவங்கள், சிறுவர்-சிறுமியருக்கு எதிரான கொலைகள், பாலியல் வன்கொடுமைகள், ஆளுங்கட்சியினரின் மாமூல் வேட்டைகள், பெட்ரோல் குண்டு வீச்சுகள் மற்றும் தற்போது அறிவிக்கப்படாத தொடர் மின்வெட்டுகள் எனத் தமிழக மக்கள் தினசரி சொல்லொணாத் துயரங்களை அனுபவித்து அல்லல்பட்டு வருகின்றனர்.

தமிழக மக்கள் சந்தித்து வரும் இத்தகைய பாதுகாப்பு மற்றும் வாழ்வாதாரப் பிரச்சினைகளைக் கண்டு கொள்ளாமல், முதலமைச்சர் விஜய் வெறும் ரீல்ஸ் மோகத்தில் திளைத்துக் கொண்டிருக்கிறார். ஆட்சிப் பொறுப்பேற்ற உடனே மாநிலத்தின் சட்டம்-ஒழுங்கு, பொதுச் சுகாதாரம், பாதுகாப்பு மற்றும் அடித்தட்டு மக்களின் அத்தியாவசியத் தேவைகள் என அனைத்திலுமே முழுமையாகக் கோட்டை விட்டு விட்டு, கமுக்கமாகத் தலைமைச் செயலகக் கோட்டைக்குள் ஒளிந்து கொள்வது தான் முதலமைச்சர் விஜய் தேர்தல் களத்தில் முன்மொழிந்த 'மாற்று' அரசியலா? 

தங்களது உன்னத அடிப்படைத் தேவையான மின்சாரம் தடையின்றித் தங்களுக்குக் கிடைக்க வேண்டும் என வீதிகளில் இறங்கிப் போராடும் எளிய மக்களை அலட்சியப்படுத்துவது தான் த.வெ.க.வின் அனைவருக்குமான பொதுநல ஆட்சியா?" என அவர் கேள்வி எழுப்பியுள்ளார்.

தி.மு.க. எனும் தீயசக்தியை முழுமையாக அழிக்க வந்த தூயசக்தி என்று தங்களைக் களத்தில் அடையாளப்படுத்திக் கொண்டு, தற்போது தி.மு.க.வின் அல்லக்கை போன்று உள்கட்டமைப்பில் செயல்பட்டுக் கொண்டிருக்கும் த.வெ.க. அரசு, கொஞ்சம் கொஞ்சமாகத் தமிழக மக்களிடம் முழுமையாக அம்பலப்பட்டுக் கொண்டிருக்கிறது என்பது தான் தற்போதைய நிதர்சனமான உண்மை என்று தெரிவித்துள்ளார்.