தூத்துக்குடியில் விறுவிறுப்பான வாக்குப்பதிவு: அமைச்சர் கீதா ஜீவன் குடும்பத்துடன் வந்து வாக்களித்தார்!

தூத்துக்குடியில் சட்டமன்ற தேர்தலுக்கான வாக்குப்பதிவு இன்று காலை 7 மணிக்குத் தொடங்கிய நிலையில், திமுக வேட்பாளரும் அமைச்சருமான கீதா ஜீவன் தனது குடும்பத்தினருடன் வந்து தனது வாக்கைச் செலுத்தினார்.

தூத்துக்குடி மாவட்டத்தில் உள்ள 6 சட்டமன்ற தொகுதிகளுக்கான வாக்குப்பதிவு இன்று காலை தொடங்கியது. தூத்துக்குடி போல்பேட்டை பகுதியில் உள்ள கீதா மெட்ரிக் மேல்நிலைப் பள்ளியில் அமைக்கப்பட்டுள்ள 83-வது வாக்குச்சாவடிக்கு இன்று காலை சரியாக 7 மணிக்கு அமைச்சர் கீதா ஜீவன் வருகை தந்தார். வரிசையில் முதல் ஆளாக நின்று அவர் தனது ஜனநாயகக் கடமையை ஆற்றினார்.

தூத்துக்குடி மாவட்டம் முழுவதும் இன்று காலை முதலே இளம் வாக்காளர்கள் மற்றும் கன்னி வாக்காளர்கள் ஆர்வத்துடன் வந்து தங்களது வாக்குகளைச் செலுத்தி வருகின்றனர். தூத்துக்குடி போல்பேட்டை பகுதியில் உள்ள கீதா மெட்ரிகுலேஷன் பள்ளியில் அமைக்கப்பட்டுள்ள 82-வது வாக்குச்சாவடியில், முதல்முறையாகத் தனது ஜனநாயகக் கடமையை ஆற்றிய கல்லூரி மாணவி ஒருவர் மிகுந்த உற்சாகத்துடன் தனது அனுபவத்தைப் பகிர்ந்து கொண்டார். 

வாக்களித்த பிறகு செய்தியாளர்களிடம் பேசிய அவர் கூறியதாவது: "முதன்முதலாக வாக்களித்திருப்பது எனக்கு மிகவும் பெருமையாக இருக்கிறது. வாக்குச்சாவடிக்குள் நுழையும்போது ஒருவிதமான அச்சமும், பதற்றமும் இருந்தது. ஆனால், வரிசையில் நின்று எனது அடையாளத்தைச் சரிபார்த்து, விரலில் மை வைத்த பிறகு அந்தப் பயம் மறைந்துவிட்டது. தற்போது எனது ஜனநாயகக் கடமையை ஆற்றியது மிகுந்த சந்தோஷத்தைத் தருகிறது என்றார்.