தமிழக சட்டமன்ற தேர்தல் வேட்புமனு தாக்கல் நிறைவு : களம் காணும் முக்கியத் தலைவர்கள்!

தமிழக சட்டமன்ற தேர்தல் 2026 வேட்புமனு தாக்கல் நிறைவு நாளான இன்று அதிமுக பொதுச்செயலாளர் எடப்பாடி பழனிசாமி, முன்னாள் முதலமைச்சர் ஓ.பன்னீர்செல்வம் உள்ளிட்டோர் இன்று மனுதாக்கல் செய்தனர். 

தமிழகச் சட்டமன்றத் தேர்தல் வாக்குப்பதிவு வரும் ஏப்ரல் 23-ஆம் தேதி நடைபெறவுள்ள நிலையில், அரசியல் களம் உச்சக்கட்டப் பரப்பரப்பை எட்டியுள்ளது. இந்தத் தேர்தலில் திமுக கூட்டணி, அதிமுக கூட்டணி, நாம் தமிழர் கட்சி மற்றும் தமிழக வெற்றிக் கழகம் (த.வெ.க) என நான்கு முனைப் போட்டி நிலவுகிறது.

கடந்த மார்ச் 30-ஆம் தேதி தொடங்கிய வேட்புமனு தாக்கல் இன்றுடன் (ஏப்ரல் 6) நிறைவடைகிறது.     முதல் நாளில் முதலமைச்சர் மு.க.ஸ்டாலின் (கொளத்தூர்), த.வெ.க தலைவர் விஜய் (பெரம்பூர்), மற்றும் நாம் தமிழர் கட்சி ஒருங்கிணைப்பாளர் சீமான் (காரைக்குடி) ஆகியோர் மனுத் தாக்கல் செய்தனர்.

இறுதி நாளில் களம் இறங்கிய முக்கியத் தலைவர்கள்: அதிமுக பொதுச்செயலாளர் எடப்பாடி பழனிசாமி, தனது சொந்தத் தொகுதியான சேலம் மாவட்டம் எடப்பாடியில் 8-வது முறையாகப் போட்டியிட வேட்புமனு தாக்கல் செய்தார். அவர் ஏற்கனவே இந்தத் தொகுதியில் 5 முறை வெற்றி பெற்றுள்ளார் என்பது குறிப்பிடத்தக்கது. 

அதேபோல், முன்னாள் முதலமைச்சர் ஓ.பன்னீர்செல்வம் தேனி மாவட்டம் போடிநாயக்கனூர் தொகுதியில் திமுக வேட்பாளராகக் களம் இறங்கித் தனது மனுவைத் தாக்கல் செய்தார். திமுகவின் மூத்த தலைவரான துரைமுருகன், காட்பாடி தொகுதியில் 13-வது முறையாகப் போட்டியிட மனுத் தாக்கல் செய்துள்ளார்.

தேமுதிக பொதுச்செயலாளர் பிரேமலதா விஜயகாந்த், கடலூர் மாவட்டம் விருத்தாசலம் தொகுதியில் போட்டியிட, கொளஞ்சியப்பர் கோயிலில் வழிபாடு செய்த பின் தனது மனுவைச் சமர்ப்பித்தார். தமிழக காங்கிரஸ் கமிட்டி தலைவர் செல்வப்பெருந்தகை ஸ்ரீபெரும்புதூர் தொகுதியிலும், பாமகவின் சவுமியா அன்புமணி தர்மபுரி தொகுதியிலும் ஆயிரக்கணக்கான தொண்டர்களுடன் ஊர்வலமாகச் சென்று வேட்புமனு தாக்கல் செய்தனர்.

பாஜக தரப்பில் முக்கியத் தலைவர்கள் இன்று களம் இறங்கினர். கோவை வடக்கு தொகுதியில் வானதி சீனிவாசன் மனுத் தாக்கல் செய்தபோது ராஜஸ்தான் முதல்வர் பஜன்லால் சர்மா உடனிருந்தார். சாத்தூர் தொகுதியில் பாஜக மாநிலத் தலைவர் நயினார் நாகேந்திரன் மத்திய அமைச்சர் அர்ஜுன் ராம் மேக்வால் முன்னிலையில் மனுத் தாக்கல் செய்தார். மயிலாப்பூரில் தமிழிசை சவுந்தரராஜன் மத்திய அமைச்சர் பியூஸ் கோயல் உடனிருக்கவும், அவிநாசி தொகுதியில் மத்திய இணை அமைச்சர் எல். முருகன் மத்திய அமைச்சர் கிஷன் ரெட்டி முன்னிலையிலும் தங்கள் வேட்புமனுக்களைத் தாக்கல் செய்தனர்.

பிற முக்கிய வேட்பாளர்கள்: