திருச்செந்தூர் கோயில் அருகே கடல் உள்வாங்கியது: பக்தர்கள் வழக்கம் போல் புனித நீராடல்!

திருச்செந்தூர் சுப்பிரமணிய சுவாமி கோயில் கடற்கரைப் பகுதியில் அமாவாசை திதியை முன்னிட்டு சுமார் 60 அடி தூரத்திற்குத் திடீரெனக் கடல் உள்வாங்கியது. இதனால் கடலுக்கு அடியில் இருந்த பாசி படிந்த பாறைகள் வெளியே தெரிந்தன.

திருச்செந்தூர் கடற்கரைப் பகுதியில் அமாவாசை மற்றும் பௌர்ணமி தினங்களில் கடல் உள்வாங்குவதும், பின்னர் மீண்டும் இயல்பு நிலைக்குத் திரும்புவதும் அவ்வப்போது நிகழும் ஒரு இயற்கை நிகழ்வாகும். இந்நிலையில், நேற்று புதன்கிழமை காலை முதல் இன்று வியாழக்கிழமை காலை வரை அமாவாசை திதி நீடிக்கிறது. இதன் காரணமாக, நேற்று காலை திருச்செந்தூர் அய்யா கோயில் மற்றும் கடற்கரைப் பகுதிகளில் கடல் நீர் சுமார் 60 அடி தூரம் வரை உள்வாங்கியது.

கடல் நீர் உள்வாங்கியதன் காரணமாக, வழக்கமாக நீருக்கு அடியில் இருக்கும் பாசி படிந்த பாறைகள் வெளியே தெரிந்தன. கடல் அலைகள் அவ்வப்போது உள்வாங்குவதும், மீண்டும் கரையை நோக்கி வருவதுமாக இருந்தன.இருப்பினும், இந்த இயற்கை மாற்றத்தைக் கண்டு பக்தர்கள் அச்சமடையவில்லை. எவ்வித அச்சமுமின்றி வழக்கம் போலக் கடலில் புனித நீராடி, சுவாமி தரிசனம் செய்தனர். இந்த நிகழ்வினால் கோயில் சடங்குகளுக்கோ அல்லது பக்தர்களுக்கோ எந்தவித பாதிப்பும் ஏற்படவில்லை.