விவசாய நிலங்களை அழித்து 4 வழிச்சாலை அமைப்பதா? கிராம மக்கள் கடும் எதிர்ப்பு!

தூத்துக்குடி - திருச்செந்தூர் - கன்னியாகுமரி இடையேயான புதிய நான்கு வழிச்சாலைத் திட்டத்திற்காக விவசாய நிலங்களைக் கையகப்படுத்துவதற்கு எதிர்ப்பு தெரிவித்து, மூலக்கரை கிராம மக்கள் மாவட்ட ஆட்சியரிடம் கோரிக்கை மனு அளித்துள்ளனர்.

கடந்த 08.02.2026 அன்று நாளிதழ்களில் வெளியான அறிவிப்பின்படி, மூலக்கரை, அம்மன்புரம் மற்றும் நத்தகுளம் ஆகிய கிராமங்களில் நிலம் கையகப்படுத்தப்பட உள்ளது. இது குறித்து கிராம மக்கள் தெரிவித்துள்ள முக்கியக் கவலைகள் பின்வருமாறு: இத்திட்டத்தினால் சுமார் 1250 ஏக்கர் விவசாய நிலங்கள் மற்றும் நீர்நிலைகள் முற்றிலுமாக அழியும் அபாயம் ஏற்பட்டுள்ளது.

ஸ்ரீவைகுண்டம் அணையின் தென்கால் பாசனத்தைப் பெறும் சீனமாவடி குளம், நத்தைக்குளம், நாலாயிரமுடையார் குளம் உள்ளிட்ட 8 குளங்களின் பாசனப் பரப்புகள் பாதிக்கப்படும். நான்கு வழிச்சாலை அமைப்பதால் கிராமத்தின் முக்கிய வடிகால் வாய்க்கால்கள் சேதமடையும். இதனால் மூலக்கரை மற்றும் அதனைச் சுற்றியுள்ள கிராமங்களின் வாழ்வாதாரம் கேள்விக்குறியாகும் என மக்கள் அஞ்சுகின்றனர்.

தற்போது திட்டமிடப்பட்டுள்ள பாதையானது விளைநிலங்கள் வழியாகச் செல்வதால், அதனைத் தவிர்த்து வண்டிப்பாதை வழியாகவோ அல்லது ஆறுமுகநேரி கிராமம் புதுக்குளத்தின் கீழ்ப்புற கரைப்பாதை வழியாகவோ அமைக்க வேண்டும் என கிராம மக்கள் வலியுறுத்தியுள்ளனர்.

"அரசு நிர்ணயித்துள்ள தற்போதைய பாதையை மாற்றி அமைப்பதன் மூலம் விவசாய நிலங்களைக் காக்க முடியும். அதே சமயம் அரசுக்கும் பணித் தொய்வு ஏற்படாமல் ஒரு நல்ல மாற்றுத் தீர்வாக இது அமையும்" என அம்மனுவில் குறிப்பிடப்பட்டுள்ளது.