தனியார் நிதி நிறுவனம் ரூ.1.10 லட்சம் நஷ்ட ஈடு வழங்க நுகர்வோர் குறைதீர் ஆணையம் உத்தரவு!

தனியார் நிதி நிறுவனம், பாதிக்கப்பட்ட நுகர்வோருக்கு ரூ.1.10 லட்சம் நஷ்ட ஈடு மற்றும் கடன் நிலுவைத் தொகைகளை தள்ளுபடி செய்ய வேண்டுமென தூத்துக்குடி மாவட்ட நுகர்வோர் குறைதீர் ஆணையம் உத்தரவிட்டது.

தூத்துக்குடி மாவட்டம் ஏரலைச் சார்ந்த ஜெயக்குமார் என்பவர்  சென்னையிலுள்ள தனியார் நிதி நிறுவனத்திடம் கடன் வாங்கியுள்ளார். கடன் வாங்கும் பொழுது ஒரு லைப் இன்ஸ்யூரன்ஸ் மற்றும் ஹெல்த் இன்ஸ்யூரன்ஸ் பாலிசி எடுப்பதற்காக பணம் செலுத்தியுள்ளார். ஆனால் தனியார் நிதி நிறுவனம்  பாலிசி வழங்காமல் இருந்துள்ளனர். அதன் பின்னர் உடல் நலம் சரியில்லாமல் ஜெயக்குமார் இறந்து விட்டார். 

இதற்காக மாவட்ட காவல் துறையிடம் ஜெயக்குமார் மனைவி சுதா புகார் மனு கொடுத்துள்ளார். உரிய காப்பீடு செய்திருந்தால் புகார்தாரரின் கடன் தொகை முழுவதும் சரி செய்யப்பட்டிருக்கும். இதனால் மன உளைச்சலுக்கு ஆளான சுதா வழக்கறிஞர் மூலம் நோட்டீஸ் அனுப்பியுள்ளனர். ஆனால் அதன் பின்னரும் உரிய பதில் கிடைக்காததால் தூத்துக்குடி  மாவட்ட நுகர்வோர் குறைதீர் ஆணையத்தில் வழக்கு தொடர்ந்தார்.

வழக்கை விசாரித்த தூத்துக்குடி மாவட்ட நுகர்வோர் குறைதீர் ஆணைய தலைவர் திருநீல பிரசாத், உறுப்பினர்கள் ஆ.சங்கர் ஆகியோர் புகார்தாரரின் கடன் நிலுவைத் தொகைகளை தனியார் நிதி நிறுவனம் தள்ளுபடி செய்ய வேண்டுமெனவும், மேலும் பாதிக்கப்பட்ட நுகர்வோருக்கு ரூபாய் 1,00,000 நஷ்ட ஈடு மற்றும் வழக்கு செலவுத் தொகை ரூபாய் 10,000 ஆகியவற்றை இரண்டு மாத காலத்திற்குள் வழங்க வேண்டும்.  இல்லையென்றால்; அத்தொகையை செலுத்தும் தேதி வரை ஆண்டொன்றுக்கு 9 சதவீத  வட்டியுடன் வழங்க வேண்டும் என உத்தரவிட்டனர்.