தூத்துக்குடியில் ஆரோக்கியமான தெருக்கள் கொள்கை ஏற்பு : ஐஐடி மெட்ராஸ் - சர்வதேச நிறுவனங்கள் கூட்டுத்திட்டம்!

தூத்துக்குடி மாநகராட்சியில் "ஆரோக்கியமான தெருக்கள் கொள்கை" மற்றும் "முழுமையான சாலை மற்றும் தெரு வடிவமைப்பு வழிகாட்டுதல்கள்" குறித்த திட்டங்கள் மாமன்றத்தில் அதிகாரப்பூர்வமாக ஏற்றுக்கொள்ளப்பட்டுள்ளன. 

பாதுகாப்பான, அனைவரையும் உள்ளடக்கிய மற்றும் காலநிலை மாற்றத்தை எதிர்கொள்ளும் திறன் கொண்ட போக்குவரத்து அமைப்பை உருவாக்கும் நோக்கில், தூத்துக்குடி மாநகராட்சி மன்றக் கூட்டத்தில் "ஆரோக்கியமான தெருக்கள் கொள்கை" மற்றும் "முழுமையான சாலை மற்றும் தெரு வடிவமைப்பு வழிகாட்டுதல்கள்" அதிகாரப்பூர்வமாக ஏற்றுக் கொள்ளப்பட்டுள்ளன. மேயர் ஜெகன் தலைமையில், துணை மேயர் ஜெனிட்டா மற்றும் மாநகராட்சி ஆணையர் பிரியங்கா முன்னிலையில் நடைபெற்ற கூட்டத்தில் இந்த முக்கிய மைல்கல் எட்டப்பட்டுள்ளது.

தொழில்துறை மற்றும் துறைமுக நகரமான தூத்துக்குடியில் அதிகரித்து வரும் போக்குவரத்து நெரிசல், போதிய நடைபாதை வசதியின்மை, ஒழுங்கற்ற வாகன நிறுத்தம் மற்றும் திட்டமிடப்படாத தெருவோர வணிகம் போன்ற சவால்களுக்குத் தீர்வுகாண இக்கொள்கை வடிவம் பெற்றுள்ளது. இக்கொள்கை மற்றும் வழிகாட்டுதல்கள், 'UK PACT' திட்டத்தின் கீழ், ஐஐடி மெட்ராஸ் (IIT Madras) தலைமையிலான கூட்டமைப்பின் மூலம், ITDP India, TERI மற்றும் CENEX ஆகிய சர்வதேச மற்றும் தேசிய நிறுவனங்களின் தொழில்நுட்ப மற்றும் செயல்பாட்டுப் பங்களிப்புடன் உருவாக்கப்பட்டுள்ளன. 

முன்னதாக, 2026 மார்ச் மாதத்தில் மாநகராட்சி அதிகாரிகளுக்கு மோட்டார் அல்லாத போக்குவரத்து (NMT) மற்றும் பேருந்து நிறுத்த திட்டமிடல் குறித்துப் பயிற்சிப் பட்டறைகளும் நடத்தப்பட்டன.

இப்புதிய வழிகாட்டுதல்களின் அடிப்படையில் மாநகரச் சாலைகள் பின்வரும் அம்சங்களுடன் நவீனமயமாக்கப்படும்:

• தொடர்ச்சியான நடைபாதைகள் மற்றும் பாதுகாப்பான பாதசாரி கடப்பிடங்கள்.

• திட்டமிடப்பட்ட பல்நோக்கு பயன்பாட்டு மண்டலங்கள் (MUZs) மற்றும் ஒழுங்குபடுத்தப்பட்ட தெருவோர வணிகப் பகுதிகள்.

• அனைவருக்கும் அணுகக்கூடிய பொதுப் போக்குவரத்து வசதிகள் மற்றும் பேருந்து நிறுத்தங்கள்.

• வேகக் கட்டுப்பாடு கொண்ட பாதுகாப்பான சாலைச் சந்திப்பு வடிவமைப்புகள்.

• வெப்பத் தாக்கத்தைக் குறைக்க மரங்கள் நிறைந்த தெருக்கள் மற்றும் பசுமை உள்கட்டமைப்பு.

• திறமையான சாலைப்பகுதி மேலாண்மை மற்றும் ஒழுங்குபடுத்தப்பட்ட வாகன நிறுத்த வசதிகள்.

இக்கொள்கை அமல்படுத்தப்படுவதன் மூலம், நடைபயணம் மற்றும் மிதிவண்டிப் பயன்பாடு ஊக்குவிக்கப்பட்டுச் சாலை விபத்துகள் குறையும் என்றும்; குழந்தைகள், முதியோர் மற்றும் மாற்றுத்திறனாளிகளுக்கான பொது இட அணுகல்தன்மை எளிமையாக்கப்பட்டு நகர மக்களின் ஒட்டுமொத்த வாழ்க்கைத் தரம் மேம்படும் என்றும் மாநகராட்சி நிர்வாகம் தெரிவித்துள்ளது.