தூத்துக்குடியில் அதிமுக போட்டி: முன்னாள் அமைச்சர் சி.த. செல்லப்பாண்டியன் பேட்டி

2026 சட்டமன்ற தேர்தலில் தூத்துக்குடியில் அதிமுக நேரடிப் போட்டியிடும் என்று முன்னாள் அமைச்சர் சி.த. செல்லப்பாண்டியன் கூறினார். 

தூத்துக்குடி டூவிபுரம் 5-வது தெருவில் அதிமுக மாநில வர்த்தக அணி அலுவலகத்தை அக்கட்சியின் மாநில வர்த்தக அணிச் செயலாளரும், முன்னாள் அமைச்சருமான சி.த. செல்லப்பாண்டியன் இன்று திறந்து வைத்தார். பின்னர் செய்தியாளர்களைச் சந்தித்த அவர் கூறியதாவது : கடந்த 2021 தேர்தலில் தூத்துக்குடி தொகுதி கூட்டணிக் கட்சிக்கு ஒதுக்கப்பட்டது. 

ஆனால், வரும் 2026 சட்டமன்றத் தேர்தலில் எடப்பாடி பழனிசாமியின் ஆசியுடன் தூத்துக்குடி தொகுதியில் அதிமுக நேரடியாகப் போட்டியிடும். வரும் தேர்தலில் 234 தொகுதிகளிலும் வெற்றி பெற்று அதிமுக மீண்டும் ஆட்சி அமைக்கும். தூத்துக்குடி மீனவர் பகுதிகளில் 'தூண்டில் வளைவு' திட்டப் பணிகள் திமுக ஆட்சியில் பாதியிலேயே நிற்கின்றன. இதற்கான நிதி எங்கே போனது என்று தெரியவில்லை. இதனால் படகுகள் சேதமடைந்து மீனவர்கள் பெரும் சிரமத்திற்கு ஆளாகியுள்ளனர்.

"சொன்னதைச் செய்வோம்" என்ற திமுக, வாக்குறுதிகளை நிறைவேற்றத் தவறிவிட்டது. அதிமுக தலைவர்களைப் பற்றிப் பேசும் விஜய், மேடைக்கு மேடை மாற்றிப் பேசுகிறார். அவர் சினிமாவில் வேண்டுமானால் 10 பேரை அடிக்கலாம், ஆனால் அரசியலில் அது எடுபடாது. "வான்கோழி ஒருபோதும் மயிலாக முடியாது." மக்கள் அவரை ஒரு நடிகராகப் பார்க்கவே கூடுகிறார்களே தவிர, அரசியல் தலைவராக அல்ல என்றார்.

இந்நிகழ்வில் மாநில வர்த்தக அணி துணைச் செயலாளர் ஆர்.எல். ராஜா, முன்னாள் மாவட்ட பஞ்சாயத்துத் தலைவர் சின்னத்துரை, மற்றும் கட்சி நிர்வாகிகள் கே.டி.சி. சங்கர், ஐயப்பன், ராதா ஆனந்த் உள்ளிட்ட பலர் கலந்து கொண்டனர்.