தூத்துக்குடியில் சட்டமன்ற பொது தேர்தல் பணிகள் : மின்னணு வாக்குப்பதிவு இயந்திரங்கள் சரிபார்ப்பு

தூத்துக்குடி மாவட்ட ஆட்சியர் அலுவலக வளாகத்தில் உள்ள மின்னணு வாக்குப்பதிவு எந்திரங்கள் வைப்பறையில் கடந்த நாடாளுமன்ற தேர்தலின் போது பயன்படுத்தப்பட்ட 3 ஆயிரத்து 786 வாக்குப்பதிவு கருவிகள், 1,765 கட்டுப்பாட்டு கருவிகள், 2,112 வாக்காளர் ஒப்புகை சீட்டு கருவிகள் ஆக மொத்தம் 7 ஆயிரத்து 663 கருவிகளும், கடந்த நாடாளுமன்ற தேர்தலின் போது பயன்படுத்தப்படாத மற்றும் பழுதான 789 வாக்குப்பதிவு கருவிகள், 438 கட்டுப்பாட்டு கருவிகள், 536 வாக்காளர் ஒப்புகை சீட்டு கருவிகள் ஆக மொத்தம் 1,763 எந்திரங்கள், தேர்தல் ஆணையத்திடம் இருந்து கூடுதலாக பெறப்பட்ட 220 கட்டுப்பாட்டு கருவிகள் ஆக மொத்தம் 4 ஆயிரத்து 575 வாக்குப்பதிவு கருவிகள், 2 ஆயிரத்து 423 கட்டுப்பாட்டு கருவிகள், 2 ஆயிரத்து 648 வாக்காளர் ஒப்புகை சீட்டு கருவிகள் ஆக மொத்தம் 9 ஆயிரத்து 646 எந்திரங்கள் பாதுகாப்பாக வைக்கப்பட்டு உள்ளன.

இந்த எந்திரங்களில் பெல் நிறுவன என்ஜினீயர்களால் முதல் நிலை சரிபார்ப்பு பணி மேற்கொள்ளப்படுகிறது. அங்கீகரிக்கப்பட்ட அரசியல் கட்சிகளின் பிரதிநிதிகள் முன்னிலையில் இந்த முதல் நிலை சரிபார்ப்பு பணியை மாவட்ட ஆட்சியர் இளம்பகவத் இன்று காலை தொடங்கி வைத்தார்.

பின்னர் அவர் கூறும் போது, மின்னணு வாக்குப்பதிவு எந்திரங்களில் முதல் நிலை சரிபார்ப்பு பணிக்காக பெங்களூரு பெல் நிறுவனத்தில் இருந்து 9 என்ஜினீயர்கள் வந்து உள்ளனர். இந்த பணியானது ஞாயிறு மற்றும் அரசு விடுமுறை நாட்களை தவிர்த்து தொடர்ந்து நடைபெறும். சம்பந்தப்பட்ட தொகுதிகளின் தேர்தல் நடத்தும் அலுவலர்கள் மற்றும் உதவி தேர்தல் நடத்தும் அலுவலர்கள் மேற்பார்வையில் பணியாளர்கள் இந்த பணியில் ஈடுபடுத்தப்படுவார்கள். இந்த பணியை அங்கீகரிக்கப்பட்ட அரசியல் கட்சியினர் தங்களது பிரதிநிதிகள் மூலம் பார்வையிட வசதி செய்யப்பட்டு உள்ளது. இந்த பணிகளை கண்காணிக்க தனி மாவட்ட அலுவலர் ஒருவர் நியமிக்கப்பட்டுள்ளார் என்று கூறினார்.