தூத்துக்குடி - தாம்பரம் தீபாவளி சிறப்பு ரயில் : முன்பதிவு தொடங்கியது!

தீபாவளியை முன்னிட்டு, தூத்துக்குடி-தாம்பரம் இடையே சிறப்பு ரயில் இயக்கப்படவுள்ளது.

தெற்கு ரயில்வே திங்கள்கிழமை வெளியிட்ட செய்திக் குறிப்பு: தூத்துக்குடியில் இருந்து அக்.29 , நவ.4-இல் இரவு 11 மணிக்கு புறப்படும் சிறப்பு ரயில் (எண் 06188) மறுநாள் காலை 10.20 மணிக்கு தாம்பரம் வந்தடையும். தாம்பரத்தில் இருந்து அக்.30, நவ.5- ஆகிய தேதிகளில் பகல் 12.20 மணிக்கு புறப்படும் ரயில் இரவு 11.45 மணிக்கு தூத்துக்குடி சென்றடையும். இதில் 3 ஏசி வகுப்பு பெட்டிகள், படுக்கை வசதி கொண்ட 9 பெட்டிகள், 4 பொதுப்பெட்டிகள் இணைக்கப்பட்டிருக்கும்.

இந்த ரயில், தூத்துக்குடி மேலூா், கோவில்பட்டி, சாத்தூா், விருதுநகா், அருப்புக்கோட்டை, மானாமதுரை, சிவகங்கை, காரைக்குடி, புதுக்கோட்டை, திருச்சி, ஸ்ரீரங்கம், அரியலூா், விருத்தாசலம், விழுப்புரம், மேல்மருவத்தூா், செங்கல்பட்டு வழியாக இயக்கப்படும். இந்த நிலையில், தூத்துக்குடி-தாம்பரம் தீபாவளி  சிறப்பு ரயில்கள் முன்பதிவு துவங்கியுள்ளது.

தூத்துக்குடி மாவட்ட பயணிகளின் கோரிக்கைகளை ஏற்று இச்சிறப்பு ரயில்களை இயக்கிய தெற்கு ரயில்வே அதிகாரிகளுக்கு தூத்துக்குடி மாவட்ட பயணிகள் சங்கத்தின் செயலாளர்

மா. பிரமநாயகம் நன்றி தெரிவித்துள்ளார்.