மும்பையில் இருந்து தூத்துக்குடிக்கு தீபாவளி சிறப்பு ரயில்: ராணிஸ்ரீ குமார் எம்பி கோரிக்கை

மும்பையில் இருந்து தூத்துக்குடிக்கு தென்காசி வழியாக தீபாவளி சிறப்பு ரயில் இயக்க வேண்டும் என்று ராணிஸ்ரீ குமார் எம்பி கோரிக்கை விடுத்துள்ளார்.

மும்பை வாழ் தென் மாவட்ட தமிழ் மக்களின் தொடர் கோரிக்கையை ஏற்று மும்பையில் இருந்து கொல்லம், தென்காசி, திருநெல்வேலி வழியாக தூத்துக்குடிக்கு சிறப்பு ரயிலை இயக்குமாறு தென்னக ரயில்வே பொது மேலாளருக்கும் மத்திய ரயில்வே பொது மேலாளருக்கும் தென்காசி எம்பி ராணி ஸ்ரீ குமார் கோரிக்கை விடுத்துள்ளார். 

அவர் கொடுத்துள்ள மனுவில் கூறியிருப்பதாவது "தென்காசி, திருநெல்வேலி மற்றும் தூத்துக்குடியை பூர்வீகமாக கொண்ட தமிழர்கள் தங்கள் குடும்பத்தினரோடு மும்பையில் வசித்து வருகின்றனர்.இவர்கள் பண்டிகை காலங்களில் தங்களுடைய சொந்த ஊர்களுக்கு வந்து உறவினர்களோடு கொண்டாடுவது வழக்கம்.மேலும் தொழில் மற்றும் வேலை நிமித்தமாகவும் பலர் தென் மாவட்டங்களில் இருந்து மும்பைக்கு பயணிக்கின்றனர். தென் மாவட்டங்களில் இருந்து மும்பைக்கு செல்லும் ரயில்களிலும் மற்றும் மும்பையில் இருந்து தென் மாவட்டங்களுக்கு இயக்கப்படும் ரயில்களிலும் முன்பதிவு இருக்கைகள் முழுவதும் காலியாகி காத்திருப்பு பட்டியலில் உள்ளது.

தென்காசி மற்றும் தூத்துக்குடி மாவட்டங்களுக்கு இதுவரை மும்பைக்கு செல்ல நேரடி ரயில் சேவைகள் இல்லை என்பது குறிப்பிடத்தக்கது.மும்பையில் இருந்து தூத்துக்குடிக்கு சிறப்பு ரயிலை இயக்கும் பொழுது ரத்தினகிரி, மங்களூர், கொல்லம், புனலூர், தென்காசி, பாவூர்சத்திரம், அம்பை, நெல்லை வழியாக இயக்க வேண்டும். இதன் மூலமாக தென்காசி மற்றும் தூத்துக்குடி மாவட்டங்களுக்கு முதன் முதலில் மும்பைக்கு நேரடி ரயில் சேவை கிடைப்பதுடன் மகாராஷ்டிரா, கர்நாடகா மற்றும் கேரளா ஆகிய மாநிலங்களின் முக்கிய நகரங்களுக்குச் செல்லவும் ரயில் சேவை கிடைக்கும்.

சுற்றுலா மேம்பாடு ஒரு மிக முக்கியமான திருத்தலமான சபரிமலை ஐயப்ப சுவாமி திருக்கோவிலானது கேரள மாநிலத்தின் புனலூர் ரயில் நிலையத்தின் அருகாமையில் இருப்பதால் கர்நாடகா, மகாராஷ்டிரா மற்றும் தமிழக மக்களுக்கும் ஐயப்ப சுவாமி திருக்கோவிலுக்குச் சென்று வர மிகவும் பயனுள்ளதாக இருக்கும். 

மேலும் தென்னிந்தியாவின் காசி எனப்படும் தென்காசி அருள்தரும் காசி விஸ்வநாதர் திருக்கோவிலுக்கும் பாவங்களை போக்கிடும் பாபநாசநாதர் திருக்கோவிலுக்கும் அறுபடை வீடுகளில் மிக முக்கியமான திருத்தலமான திருச்செந்தூர் சுப்பிரமணிய சுவாமி திருக்கோவிலுக்கும் ரயில் சேவையானது கிடைக்கும். எனவே இந்த சிறப்பு ரயிலை பயணிகள் நலன் கருதி உடனடியாக இயக்குமாறு அவர் தன்னுடைய கோரிக்கையில் குறிப்பிட்டுள்ளார்.