லட்சக்கணக்கான கோடி கடன் எங்கே போனது? தமிழக பட்ஜெட் குறித்து அண்ணாமலை கேள்வி

தமிழக அரசின் 2026-27 ஆம் ஆண்டிற்கான இடைக்கால பட்ஜெட், பொதுமக்களை ஏமாற்றும் ஒரு வெற்று அறிக்கையாக இருப்பதாக பாஜக முன்னாள் தலைவர் அண்ணாமலை கடுமையாக விமர்சித்துள்ளார். 

இது தொடர்பாக அவர் தனது 'எக்ஸ்' (X) சமூக வலைதளப் பக்கத்தில் பதிவிட்டுள்ள அறிக்கையில் திமுக அரசு கடந்த ஐந்து ஆண்டுகளில் வாங்கிய கடன்கள் குறித்து முக்கியக் கேள்விகளை எழுப்பியுள்ளார்:

கடனின் அளவு: வரும் மார்ச் 31, 2027-க்குள் தமிழகத்தின் மொத்தக் கடன் 10,62,248 கோடி ரூபாயாக இருக்கும் என அரசு தெரிவித்துள்ளது.

நிதி எங்கே?: "திமுக அரசு பழைய வாக்குறுதிகளையும் நிறைவேற்றவில்லை, புதிய திட்டங்களையும் செயல்படுத்தவில்லை. மக்களின் அடிப்படைத் தேவைகள்கூட பூர்த்தி செய்யப்படாத நிலையில், இத்தனை லட்சம் கோடி கடன் எதற்காக வாங்கப்பட்டது? அந்த நிதி எங்கே சென்றது?" என அவர் கேள்வி எழுப்பியுள்ளார்.

கோவை மற்றும் மதுரை மெட்ரோ ரயில் திட்டங்கள் முடங்கியிருப்பதற்கு திமுக அரசே காரணம் என்று அவர் குற்றம் சாட்டியுள்ளார்:

திமுகவுக்கு வாக்களிக்காத காரணத்தால் கோவை, மதுரை நகரங்களில் மெட்ரோ திட்டம் வரக்கூடாது என்பதில் அரசு குறியாக உள்ளது.

இதற்காகவே வேண்டுமென்றே தவறான திட்ட அறிக்கையை (DPR) தாக்கல் செய்துவிட்டு, தற்போது மத்திய அரசு மீது பழி போடுகிறார்கள்.

திருத்தப்பட்ட திட்ட அறிக்கையைச் சமர்ப்பிக்க 4 மாதங்களுக்கு மேலாகியும் திமுக அரசு இன்னும் காலம் தாழ்த்தி வருவது, அவர்களுக்கு இத்திட்டத்தின் மீது அக்கறை இல்லை என்பதைக் காட்டுகிறது.

கடந்த ஐந்து ஆண்டுகளில் ஆசிரியர்கள், அரசு மருத்துவர்கள், தூய்மைப் பணியாளர்கள் மற்றும் இளைஞர்களின் எந்தவொரு கோரிக்கையையும் இந்த அரசு நிறைவேற்றவில்லை என்று அவர் குறிப்பிட்டுள்ளார்.

"பள்ளி மாணவர்களிடையே பெருகி வரும் போதைப்பொருள் கலாசாரம், அடிப்படை வசதியற்ற விடுதிகள் என எதைப் பற்றியும் கவலைப்படாமல், நிதியமைச்சர் பொய்களை மட்டுமே வாசித்துச் சென்றிருக்கிறார்," என்று அண்ணாமலை சாடியுள்ளார்.

நிதியமைச்சர் தங்கம் தென்னரசு அவசர அவசரமாக பட்ஜெட்டை வாசித்த விதம், "இனி எதிர்க்கட்சி வரிசையில் அமர்ந்துவிடலாம் என்ற நிம்மதிப் பெருமூச்சைப் போலவே இருந்தது" என அண்ணாமலை விமர்சித்துள்ளார். மேலும், வழக்கமாக இடம்பெறும் கூவம் மற்றும் அடையாறு சுத்திகரிப்பு திட்டங்கள் குறித்த 'நகைச்சுவை' இந்த ஆண்டு பட்ஜெட்டில் விடுபட்டிருப்பது வருத்தமளிப்பதாகவும், கடந்த ஆண்டுகளில் இதற்காக ஒதுக்கப்பட்ட ரூ. 1,500 கோடி எங்கே போனது என்றும் அவர் கேள்வி எழுப்பியுள்ளார்.