சென்னை உயர் நீதிமன்றத்திற்கு 19 புதிய நீதிபதிகள் நியமனம்: கொலிஜியம் ஒப்புதல்!

சென்னை உயர் நீதிமன்றத்தின் காலிப் பணியிடங்களை நிரப்புவதற்காக, 9 மாவட்ட நீதிபதிகள் மற்றும் 10 மூத்த வழக்கறிஞர்கள் உட்பட மொத்தம் 19 பேரைப் புதிய நீதிபதிகளாக நியமிக்க உச்ச நீதிமன்ற கொலிஜியம் அதிகாரப்பூர்வ ஒப்புதலை வழங்கியுள்ளது.

சென்னை உயர் நீதிமன்றத்திற்கு அனுமதிக்கப்பட்ட ஒட்டுமொத்த நீதிபதிகளின் எண்ணிக்கை 75 ஆகும். ஆனால், இதில் 23 நீதிபதி பணியிடங்கள் நீண்ட நாட்களாக நிரப்பப்படாமல் காலியாகவே இருந்து வருகின்றன. இதனால் லட்சக்கணக்கான வழக்குகள் தேக்கமடைந்து வந்த சூழலில், இந்தக் காலிப் பணியிடங்களை விரைந்து நிரப்ப நீதித்துறை சார்பில் நடவடிக்கைகள் மேற்கொள்ளப்பட்டன.

இதன் தொடர்ச்சியாக, கடந்த 2025-ஆம் ஆண்டில் மாவட்ட நீதிமன்ற நீதிபதிகள் அந்தஸ்தில் உள்ள 9 பேரின் பெயர்களும், சென்னை உயர் நீதிமன்றத்தில் பணியாற்றும் மூத்த வழக்கறிஞர்கள் 10 பேரின் பெயர்களும் புதிய நீதிபதிகள் நியமனப் பரிந்துரைப் பட்டியலாக டெல்லிக்கு அனுப்பி வைக்கப்பட்டன.

மாவட்ட நீதிபதிகள் அந்தஸ்தில் இருந்து (9 பேர்):

    எஸ். அல்லி (சென்னை உயர் நீதிமன்ற தலைமைப் பதிவாளர்)

    முருகன்

    சுமதி

    திருமகள் சந்திரசேகர்

    தர்மலிங்கம் லிங்கேஸ்வரன்

    கார்த்திகேயன் பாலதாண்டாயுதம்

    சண்முகம் கார்த்திகேயன்

    பாலுச்சாமி முருகேசன்

    குணசேகரன்

    என். ரமேஷ்

    ஜி.கே. முத்துக்குமார்

    ராஜேஷ் விவேகானந்தன்

    சங்கரநாராயணன் ரவிக்குமார்

    நாகராஜன் திலீப்குமார்

    இ. மனோகரன்

    கிருஷ்ணசாமி கோவிந்தராஜன்

    ரஜினிஷ் பதியில்

    கே. அப்பாதுரை

    ஆர். அனிதா

டெல்லியில் நேற்று நடைபெற்ற உச்ச நீதிமன்ற கொலிஜியத்தின் உயர்நிலைக் கூட்டத்தில், இந்த 19 பேரின் தகுதிகள் மற்றும் பின்னணிகள் விரிவாக ஆய்வு செய்யப்பட்டு, அவர்களின் பெயர்களுக்கு ஒருமனதாக ஒப்புதல் முத்திரை குத்தப்பட்டது.

அடுத்த கட்டமாக, இந்த ஒப்புதல் பட்டியல் மத்திய சட்ட அமைச்சகத்தின் இறுதிச் சான்றிற்கு அனுப்பி வைக்கப்படும். மத்திய அரசு இதற்குப் பச்சைக்கொடி காட்டியவுடன், இந்தியக் குடியரசுத் தலைவர் புதிய நீதிபதிகள் நியமனத்திற்கான அதிகாரப்பூர்வ அரசாணையை முறைப்படி பிறப்பிப்பார். அதன் பின் இவர்கள் அனைவரும் சென்னை உயர் நீதிமன்ற நீதிபதிகளாகப் பதவியேற்றுக் கொள்வார்கள் என எதிர்பார்க்கப்படுகிறது. 19 புதிய நீதிபதிகள் ஒரே நேரத்தில் நியமிக்கப்பட உள்ளதால் சென்னை உயர் நீதிமன்றத்தில் வழக்குகள் மீதான விசாரணை இனி வேகம் எடுக்கும்.