தமிழக அமைச்சரவை இலாகாக்கள் ஒதுக்கீடு: ஆளுநர் மாளிகை அதிகாரப்பூர்வ அறிவிப்பு!

தமிழகத்தில் புதிய அரசு பதவியேற்றதைத் தொடர்ந்து, அமைச்சர்களுக்குத் துறைகள் ஒதுக்கீடு செய்வதில் நிலவி வந்த தாமதங்களுக்கு முற்றுப்புள்ளி வைக்கும் வகையில், யாருக்கு எந்தெந்தத் துறைகள் என்பது குறித்த அதிகாரப்பூர்வப் பட்டியலை ஆளுநர் மாளிகை வெளியிட்டுள்ளது.

அமைச்சர்களுக்கான துறைகள் ஒதுக்கீடு செய்யப்படுவதில் ஏற்பட்ட காலதாமதம் காரணமாகத் தலைமைச் செயலகத்தில் சுமார் 3,000-க்கும் மேற்பட்ட அரசு முக்கியக் கோப்புகள் (Files) முதலமைச்சர் மற்றும் அமைச்சர்களின் கையெழுத்திற்காகக் காத்திருப்பதாக நேற்று (மே 15) செய்திகள் வெளியாகி இருந்தன. இத்தகைய நிர்வாக நெருக்கடிக்கு இடையே, தற்பொழுது இலாகாக்கள் முறைப்படி ஒதுக்கீடு செய்யப்பட்டுள்ளன.

ஆளுநர் அலுவலகம் வெளியிட்டுள்ள அதிகாரப்பூர்வச் செய்திக்குறிப்பின்படி, புதிய அமைச்சரவையின் இலாகாக்கள் விபரம் பின்வருமாறு:

முதலமைச்சர் விஜய்: பொது நிர்வாகம், காவல் துறை, உள்துறை, சிறப்புத் திட்ட அமலாக்கம், இளைஞர் நலன், நகராட்சி நிர்வாகம், குடிநீர் வழங்கல் மற்றும் மாற்றுத்திறனாளிகள் நலத்துறை ஆகிய மிக முக்கியத் துறைகளைத் தன் வசம் வைத்துள்ளார்.

• செங்கோட்டையன்: மாநிலத்தின் மிக முக்கியத் துறையான நிதித் துறை  அமைச்சராக நியமிக்கப்பட்டுள்ளார்.

• நிர்மல்குமார்: மின்சாரம் மற்றும் மரபுசாரா எரிசக்தித் துறை, சட்டம் மற்றும் நீதித்துறை அமைச்சராகப் பொறுப்பேற்கிறார்.

• என். ஆனந்த்: ஊரக வளர்ச்சி மற்றும் நீர்வளத்துறை அமைச்சராக நியமிக்கப்பட்டுள்ளார்.

• ஆதவ்: பொதுப்பணித்துறை மற்றும் விளையாட்டு மேம்பாட்டுத்துறை அமைச்சராகச் செயல்படுவார்.

• அருண்ராஜ்: மக்கள் நல்வாழ்வு மற்றும் சுகாதாரத்துறை அமைச்சராகப் பொறுப்பேற்கிறார்.

• வெங்கட்ரமணன்: உணவு மற்றும் நுகர்வோர் பாதுகாப்புத்துறை (உணவுத்துறை) அமைச்சராக நியமிக்கப்பட்டுள்ளார்.

• ராஜ்மோகன்: பள்ளிக்கல்வி, தமிழ் வளர்ச்சி மற்றும் செய்தி மக்கள் தொடர்புத்துறை அமைச்சராகச் செயல்படுவார்.

• டி.கே. பிரபு: சுரங்கம் மற்றும் கனிமவளத்துறை அமைச்சராகப் பொறுப்பேற்கிறார்.

• கீர்த்தனா: தொழில்துறை அமைச்சராக நியமிக்கப்பட்டுள்ளார்.

துறைகள் ஒதுக்கீடு செய்யப்பட்டுள்ளதைத் தொடர்ந்து, புதிய அமைச்சர்கள் அனைவரும் உடனடியாகத் தங்களுக்கு ஒதுக்கப்பட்ட தலைமைச் செயலக அலுவலகங்களுக்குச் சென்று கோப்புகளில் கையெழுத்திட்டுத் தங்களது பணிகளை முறைப்படி தொடங்க உள்ளனர். இதன் மூலம் கடந்த ஒரு வார காலமாகத் தொய்வடைந்திருந்த தமிழக அரசின் முக்கியத் துறைச் செயல்பாடுகள் இனி போர்க்கால அடிப்படையில் வேகம் பெறும் என்று எதிர்பார்க்கப்படுகிறது.