சமூக வலைத்தளங்களில் வைரலான 'டிரம்ப்' எருமை: பக்ரீத் குர்பானியிலிருந்து தப்பியது!

வங்கதேசத்தில் அமெரிக்க அதிபர் டொனால்ட் டிரம்ப் போன்ற தலைமுடித் தோற்றத்தைக் கொண்ட அல்பினோ வகையைச் சேர்ந்த அரிய வெள்ளை எருமை தேசிய உயிரியல் பூங்காவிற்கு மாற்றப்பட்டுள்ளது. 

வங்கதேசத்தில் அமெரிக்க  அதிபர் டொனால்ட் டிரம்ப் போன்ற தலைமுடித் தோற்றத்தைக் கொண்ட அல்பினோ வகையைச் சேர்ந்த அரிய வெள்ளை எருமை ஒன்று, பக்ரீத் பண்டிகை தியாகத் திருநாளின் பலியிடுதலிலிருந்து (குர்பானி) நூலிழையில் காப்பாற்றப்பட்டுள்ளது. விலங்கு நல ஆர்வலர்கள் மற்றும் பொதுமக்களின் தொடர் கோரிக்கையை ஏற்று, அந்த எருமையை டாக்காவில் உள்ள தேசிய உயிரியல் பூங்காவிற்கு மாற்ற அரசு முறைப்படி உத்தரவிட்டுள்ளது.

வங்காளதேசத்தில் வரவிருக்கும் பக்ரீத் பண்டிகைக்காகப் பல்வேறு கால்நடைச் சந்தைகளில் விற்பனைக்காக மாடுகள் கொண்டு வரப்பட்டன. அதில் ஒரு சந்தைக்குக் கொண்டு வரப்பட்ட அல்பினோ வகை வெள்ளை எருமை மாடு, அங்கு வந்திருந்த அனைவரின் கவனத்தையும் ஈர்த்தது.

அதன் தலையில் இருந்த பொன்னிறத் தலைமுடி மற்றும் முக அமைப்பு, அமெரிக்க அதிபர் டொனால்ட் டிரம்ப் அவர்களின் உலகப் புகழ்பெற்ற தலைமுடி அலங்காரத்தை அச்சு அசலாகப் பிரதிபலிக்கும் வகையில் அமைந்திருந்தது. இதுகுறித்த புகைப்படங்கள் மற்றும் காணொளிகள் இணையத்தில் வெளியாகி, உலக அளவில் மிகத் தீவிரமாகப் பரவி பெரும் பேசுபொருளானது.

பக்ரீத் பண்டிகைக்காக இந்த அரிய வகை எருமையை யாராவது விலைக்கு வாங்கி குர்பானி கொடுத்துவிடுவார்களோ என்ற அச்சம் பொதுமக்களிடமும், விலங்கு நல அமைப்புகளிடமும் எழுந்தது. மரபணு மாற்றக் குறைபாட்டால் பிறக்கும் இத்தகைய அல்பினோ உயிரினங்கள் மிகவும் அரிதானவை என்பதால், இதனைப் பலியிடக் கூடாது என்றும், இதைப் பாதுகாக்கப்பட்ட பொது இடத்தில் பராமரிக்க வேண்டும் என்றும் இணையதளம் வாயிலாக ஆயிரக்கணக்கான மக்கள் வங்காளதேச அரசுக்குத் தொடர் கோரிக்கைகளை முன்வைத்தனர்.

மக்களின் நெகிழ்ச்சியான மற்றும் நியாயமான கோரிக்கையை ஏற்றுக்கொண்ட வங்காளதேச அரசு, அந்த அரிய வெள்ளை எருமையை பக்ரீத் பண்டிகை பலியிடுதலிலிருந்து முழுமையாக விலக்கிக் காப்பாற்ற அதிரடி நடவடிக்கை எடுத்தது. அதன்படி, இந்த எருமையை எவரும் தனிநபர் பயன்பாட்டிற்கோ அல்லது குர்பானிக்கோ வாங்குவதற்குத் தடை விதிக்கப்பட்டுள்ளது. 

மேலும், இந்த அரிய உயிரினத்தைப் பொதுமக்கள் அனைவரும் பார்த்து ரசிக்கும் வகையிலும், அதன் வாழ்நாளைப் பாதுகாப்பான முறையில் கழிக்கும் வகையிலும், தலைநகர் டாக்காவில் அமைந்துள்ள தேசிய உயிரியல் பூங்காவிற்கு உடனடியாக மாற்றிப் பராமரிக்க அரசு சிறப்பு உத்தரவைப் பிறப்பித்துள்ளது. அரசின் நடவடிக்கைக்குச் சர்வதேச அளவில் விலங்கு நல ஆர்வலர்கள் தங்களது பாராட்டுகளைத் தெரிவித்து வருகின்றனர்.