ஈரான் உச்ச தலைவர் பற்றி தகவல் கொடுத்தால் 10 மில்லியன் டாலர் வெகுமதி: அமெரிக்கா அறிவிப்பு

ஈரானின் புதிய உச்ச தலைவர் மோஜ்தபா காமேனி மற்றும் அந்நாட்டின் முக்கிய ராணுவ அதிகாரிகள் குறித்த தகவல்களைத் தருவோருக்கு 10 மில்லியன் டாலர் வரை வெகுமதி அளிக்கப்படும் என்று அமெரிக்க வெளியுறவுத்துறை அறிவித்துள்ளது.

ஈரானின் முன்னாள் உச்ச தலைவர் அயதுல்லா அலி காமேனி மறைவைத் தொடர்ந்து, அவரது மகன் மோஜ்தபா காமேனி புதிய உச்ச தலைவராகப் பொறுப்பேற்றுள்ளார். இந்நிலையில், மோஜ்தபா காமேனி உட்பட பல முக்கியத் தலைவர்களை ‘ஈரானிய பயங்கரவாதத் தலைவர்கள்’ என்று அமெரிக்கத் தரப்பு விமர்சித்துள்ளது.

இது குறித்து அமெரிக்கப் பாதுகாப்புத் துறை வெளியிட்டுள்ள எக்ஸ் (X) பதிவில் கூறியிருப்பதாவது: "இப்பட்டியலில் உள்ள நபர்கள், ஈரானின் இஸ்லாமியப் புரட்சிகரக் காவல்படையின் (IRGC) பல்வேறு பிரிவுகளை வழிநடத்துகிறார்கள். இந்தப் படை உலகம் முழுவதும் பயங்கரவாதத் திட்டங்களை ஒருங்கிணைத்துச் செயல்படுத்துகிறது. இவர்களைப் பற்றிய நம்பகமான தகவல்களை அளிப்பவர்களுக்கு ‘நீதிக்கான வெகுமதி’ (Rewards for Justice) திட்டத்தின் கீழ் 10 மில்லியன் அமெரிக்க டாலர் வரை வெகுமதி வழங்கப்படும்.”

அமெரிக்கா வெளியிட்டுள்ள தேடப்படும் நபர்களின் பட்டியலில் மோஜ்தபா காமேனி மட்டுமின்றி, முக்கிய அதிகாரிகளும் இடம்பெற்றுள்ளனர்:

எஸ்மாயில் காதிப் – புலனாய்வுத் துறை அமைச்சர்.

அலி அஸ்கர் ஹெஜாசி – துணைத் தலைமைத் தளபதி.

யஹ்யா ரஹீம் சஃபாவி – மேஜர் ஜெனரல்.

எஸ்கந்தர் மோமெனி – உள்துறை அமைச்சர்.

அலி லாரிஜானி – தேசிய பாதுகாப்பு கவுன்சில் செயலாளர்.

அமெரிக்காவிற்கும் ஈரானுக்கும் இடையே நீண்டகாலமாக நிலவி வரும் மோதல் மற்றும் சமீபத்திய போர்ச் சூழல்களுக்கு மத்தியில், அந்நாட்டின் ஒட்டுமொத்தத் தலைமைப் பீடத்தையே குறிவைத்து அமெரிக்கா இந்த அதிரடி அறிவிப்பை வெளியிட்டுள்ளது. இது சர்வதேச அரசியலில் பெரும் பரபரப்பை ஏற்படுத்தியுள்ளது.