கன்னியாகுமரி மாவட்டத்தின் தலைநகரான நாகர்கோவிலில் நாகர்கோவில் சந்திப்பு மற்றும் நாகர்கோவில் டவுன் ஆகிய இரண்டு ரயில் நிலையங்கள் வழியே ரயில்கள் இயக்கப்பட்டு வருகின்றன.
தமிழ்நாட்டின் மதுரை, திருநெல்வேலி வழியே நாகர்கோவில் வந்து, கேரளா மார்க்கமாகச் செல்லும் ரயில்கள் நாகர்கோவில் டவுன் ரயில் நிலையத்தில் நின்று பயணிகளை ஏற்றி, இறக்கிச் செல்கின்றன.
தற்போது பின்வரும் நான்கு தினசரி ரயில்கள் நாகர்கோவில் டவுன் வழியாக இயக்கப்படுகின்றன:
திருச்சி – திருவனந்தபுரம் இன்டர்சிட்டி எக்ஸ்பிரஸ்
சென்னை எழும்பூர் – கொல்லம் அனந்தபுரி எக்ஸ்பிரஸ்
சென்னை எழும்பூர் – குருவாயூர் எக்ஸ்பிரஸ்
மதுரை – புனலூர் எக்ஸ்பிரஸ்
இதுமட்டுமன்றி, திருநெல்வேலி – காந்திதாம் வாராந்திர ரயில், திருநெல்வேலி – ஜாம்நகர் வாரம் இருமுறை ரயில், திருநெல்வேலி – பிலாஸ்பூர் வாராந்திர ரயில் ஆகிய 3 வாராந்திர ரயில்களும் டவுன் நிலையத்தின் வழியாகவே செல்கின்றன.
பயணிகள் சந்திக்கும் குழப்பங்களும் சிரமங்களும்:
மாவட்டத்தின் முக்கிய 4 தினசரி ரயில்களும் நாகர்கோவில் டவுன் வழியாகவே இயக்கப்படுவதால், போதிய அனுபவமில்லாத பயணிகள் எந்த ரயில் நிலையத்திற்குச் செல்வது என்று தெரியாமல் குழப்பமடைகின்றனர். இதனால் ஒரு நிலையத்திலிருந்து மற்றொரு நிலையத்திற்குச் செல்ல பேருந்துகளையே நம்பியிருக்க வேண்டியுள்ளது.
எர்ணாகுளத்தில் இரண்டு ரயில் நிலையங்கள் இருந்தாலும், சில ரயில்கள் இரண்டு நிலையங்களிலும் நின்று செல்கின்றன. அதேபோல, கன்னியாகுமரி மார்க்கமாகச் செல்லும் ரயில்களும் நாகர்கோவில் டவுன் மற்றும் நாகர்கோவில் சந்திப்பு ஆகிய இரண்டு நிலையங்களிலும் நின்று சென்றால் பயணிகள் எளிதாக மாறிப் பயணிக்க பயனுள்ளதாக இருக்கும்.
தற்போது கன்னியாகுமரி – மங்களூர் பரசுராம் எக்ஸ்பிரஸ், நாகர்கோவில் – கோட்டயம் எக்ஸ்பிரஸ் மற்றும் கன்னியாகுமரி – புனலூர் எக்ஸ்பிரஸ் தவிர மற்ற பயணிகள் ரயில்கள் (Passenger Trains) மட்டுமே இரண்டு நிலையங்களிலும் நின்று செல்கின்றன.
புகழ்பெற்ற ஆன்மீக மற்றும் சுற்றுலாத் தலமான கன்னியாகுமரிக்கு தினமும் ஏராளமான பயணிகள் வருகின்றனர். நாகர்கோவில் டவுன் ரயில் நிலையத்தில் இறங்கும் பயணிகள் கன்னியாகுமரி செல்ல வேண்டுமென்றால், முதலில் வடசேரி கிறிஸ்டோபர் பேருந்து நிலையத்திற்குச் சென்று, அங்கிருந்து வேறு பேருந்தைப் பிடிக்க வேண்டும்; அல்லது அதிகக் கட்டணம் கொடுத்து ஆட்டோ/டேக்ஸி மூலம் செல்ல வேண்டிய கட்டாயம் நிலவுகிறது.
முக்கிய ரயில்களுக்கான நிறுத்தம் கோரிக்கை:
கேஎஸ்ஆர் பெங்களூரு – கன்னியாகுமரி எக்ஸ்பிரஸ் (16526/16525): திருச்சியிலிருந்து திருவனந்தபுரம் செல்லும் இன்டர்சிட்டி ரயிலில் மதியம் 1:35 மணிக்கு நாகர்கோவில் டவுன் வரும் பயணிகள், கன்னியாகுமரி செல்ல மதியம் 1:55 மணிக்கு நாகர்கோவில் சந்திப்பு வழியே செல்லும் பெங்களூரு – கன்னியாகுமரி எக்ஸ்பிரஸைப் பயன்படுத்தலாம்.
ஆனால், இந்த ரயில் நாகர்கோவில் டவுன் நிலையத்தில் நிற்பதில்லை. அதேபோல், கன்னியாகுமரியிலிருந்து வரும் பயணிகள் நாகர்கோவில் டவுனில் இறங்கி, மதியம் 12:40 மணிக்கு திருச்சி செல்லும் இன்டர்சிட்டி ரயிலைப் பிடிக்கவும் இந்த ரயில் டவுன் நிலையத்தில் நின்று செல்வது அவசியமாகும். எனவே, பெங்களூரு – கன்னியாகுமரி (16526/16525) எக்ஸ்பிரஸ் ரயிலுக்கு இரண்டு மார்க்கங்களிலும் நாகர்கோவில் டவுன் நிலையத்தில் நிறுத்தம் வழங்க வேண்டும்.
கன்னியாகுமரி – புனே எக்ஸ்பிரஸ்: இதேபோல கன்னியாகுமரி – புனே எக்ஸ்பிரஸ் ரயிலுக்கும் இரு மார்க்கங்களிலும் நாகர்கோவில் டவுன் ரயில் நிலையத்தில் நிறுத்தம் அனுமதிக்க வேண்டும்.
கன்னியாகுமரி – புனலூர் எக்ஸ்பிரஸ்: கொரோனா ஊரடங்கிற்கு முன்பு நிறுத்தப்பட்டது போல, கன்னியாகுமரி – புனலூர் ரயிலுக்கும் மீண்டும் நாகர்கோவில் டவுன் நிலையத்தில் நிறுத்தம் வழங்கப்பட வேண்டும்.
திருவனந்தபுரம் மத்திய ரயில் நிலையத்திலிருந்து வெறும் 2 கி.மீ தொலைவிலுள்ள 'திருவனந்தபுரம் பேட்டை' ரயில் நிலையத்தில் கேரளா எக்ஸ்பிரஸ் போன்ற சூப்பர்பாஸ்ட் ரயில்கள் நின்று செல்லும் போது, நாகர்கோவில் டவுன் நிலையத்திலும் இந்த ரயில்களை நிறுத்திச் செல்ல ரயில்வே நிர்வாகம் நடவடிக்கை எடுக்க வேண்டும் எனப் பயணிகள் மற்றும் சமூக ஆர்வலர்கள் கோரிக்கை விடுத்துள்ளனர்.