நாட்டுக் கோழிக்குஞ்சுகள் வழங்கும் திட்டம் : ஏழை பெண்கள் விண்ணப்பிக்கலாம்!

குமரி மாவட்டத்தில்,40 நாட்டுக் கோழிக்குஞ்சுகள் 50% மானியத்தில் பெற ஆதரவற்ற பெண்கள் விண்ணப்பிக்கலாம் என்று மாவட்ட ஆட்சியர் அழகுமீனா தெரிவித்துள்ளார். 

கிராமப்புறங்களில் உள்ள ஏழை பெண்கள் விதவைகள் கணவனால் கைவிடப்பட்டோர் மற்றும் ஆதரவற்ற பெண்களுக்கு நான்கு வாரங்கள் உடைய 40 நாட்டுக் கோழிக்குஞ்சுகள் 50% மானியத்தில் வழங்கும் திட்டம் கன்னியாகுமரி மாவட்டத்தில் 900 அலகுகள் செயல்படுத்தப்படவுள்ளது. இத்திட்டத்தில் ஒரு பயனாளிக்கு நான்கு வாரமுடைய  40 நாட்டுக்கோழிக்குஞ்சுகள் 50% மானியத்தில் ரூ.1600/- செலவில் வழங்கப்படவுள்ளது. 

தேர்வு செய்யப்பட்ட பயனாளிகளுக்கு கோழி வளர்ப்பு குறித்து ஒரு நாள் பயிற்சி அளிக்கப்படும். இத்திட்டத்தில் பயனாளியாக தேர்வு செய்திட பயனாளி ஊரக பகுதியில் உள்ளவராகவும் அந்தந்த கிராமங்களில் நிரந்தரமாக வசிப்பவராகவும் கோழி வளர்ப்பில் ஆர்வமுடையராக இருத்தல் வேண்டும். 30% பயனாளிகள் தாழ்த்தப்பட்ட/ பழங்குடியினர் இனத்தைச் சேர்ந்தவர்களாக இருத்தல் வேண்டும். ஏற்கனவே அரசால் வழங்கப்பட்ட இலவச ஆடு/மாடு/கோழிகள் திட்டத்தில் பயனடைந்தவராக இருத்தல் கூடாது.

மேற்கண்ட தகுதிவாய்ந்த விருப்பமுள்ள பயனாளிகள் ஆதார் அட்டை நகலுடன், அருகிலுள்ள கால்நடை மருந்தக, கால்நடை உதவி மருத்துவரிடம் விண்ணப்பம் அளித்திடவும் ஏற்கனவே கடந்த மாதம் நடைபெற்ற மக்களுடன் முதல்வர் முகாமில் 50% மானியத்தில் கோழிகள் கோரி விருப்பம் விண்ணப்பம் அளித்த பயனாளிகள் விண்ணப்பிக்க வேண்டாம் எனவும் மாவட்ட ஆட்சித் தலைவர் ஆர்.அழகுமீனா கேட்டுக்கொள்கிறார்.