தம்பியை அடித்துக்கொன்ற கறிக்கடைக்காரர் : தூத்துக்குடி அருகே பயங்கரம்!

தூத்துக்குடி அருகே தம்பியை கட்டையால் அடித்துக் கொன்ற இறைச்சி கடைக்காரரை போலீசார் கைது செய்தனர். 

தூத்துக்குடி மாவட்டம், எப்போதும் வென்றான் அருகே சோழபுரம் கிராமம் கிழக்குத் தெருவைச் சேர்ந்தவர் கண்ணன் மகன் முத்துக்குட்டி (26). டிரைவராக பணியாற்றி வந்துள்ளார்.  இவரது உடன் பிறந்த அண்ணன் பொன் மாடசாமி (30), கறிக்கடையில் வேலை பார்த்து வருகிறார். இருவருக்கும் இடையே சொத்து பிரச்சினை இருந்துள்ளது. இந்நிலையில் நேற்று நள்ளிரவு சகோதரர்களுக்கு இடையே மீண்டும் பிரச்சினை ஏற்பட்டுள்ளது. 

இதில் ஆத்திரம் அடைந்த பொன்மாடசாமி, தம்பி முத்துக்குட்டியை மரக்கட்டையால் தாக்கி கொலை செய்து விட்டு தப்பியோடிவிட்டார். இதுகுறித்து தகவல் அறிந்து எப்போதும் வென்றான் போலீசார் சம்பவ இடத்திற்கு சென்று விசாரணை நடத்தினர். மேலும் அவரது சடலத்தை மீட்டு பரிசோதனைக்காக தூத்துக்குடி அரசு மருத்துவமனைக்கு அனுப்பி வைத்தனர். இது தொடர்பாக இன்ஸ்பெக்டர் ஜின்னா பீர் முகம்மது வழக்குப் பதிந்து, பொன் மாடசாமியை கைது செய்து விசாரணை நடத்தி வருகிறார். இந்த சம்பவம் அப்பகுதியில் பரபரப்பை ஏற்படுத்தியுள்ளது.