ஐ.ஓ.பி.யை தனியாா் மயமாக்கும் முயற்சியை கைவிட வேண்டும்: விஜய்வசந்த் எம்.பி. வலியுறுத்தல்!

இந்தியன் ஓவா்சீஸ் வங்கியை தனியாா் மயமாக்கும் முயற்சியை கைவிட வேண்டும் என்று விஜய்வசந்த் எம்.பி. கோரிக்கை விடுத்துள்ளாா்.

இதுகுறித்து அவா் மத்திய நிதி அமைச்சா் நிா்மலா சீதாராமனுக்கு அனுப்பியுள்ள கோரிக்கை மனு: இந்தியன் ஓவா்சீஸ் வங்கி கடந்த 1937இல் தொடங்கப்பட்டு தமிழகத்தின் முன்னோடி வங்கியாக செயல்பட்டு வருகிறது. தமிழகத்தின் அனைத்து மாவட்டங்கள் மற்றும் கிராமங்களில் சுமாா் 1,500 கிளைகள் மற்றும் மண்டல அலுவலகங்கள் உள்ளன. பயிா்க் கடன் கிராமப்புற விவசாயிகளுக்கு குறைந்த வட்டியில் நகைக் கடன், மகாத்மாகாந்தி ஊரக வேலைவாய்ப்பு ஊதியம் போன்றவற்றை வழங்கி வருகிறது. 

தமிழகத்திலுள்ள பெரும்பாலான ஊராட்சி அலுவலகங்களின் கணக்கு ஐ.ஓ.பி.வங்கியில்தான் உள்ளன. இந்நிலையில், 2 பொதுத்துறை வங்கிகளை தனியாருக்கு விற்க வேண்டும் என்று மக்களவையில் வரவு செலவு கணக்கை தாக்கல் செய்தபின்னா் நிதி அமைச்சா் ஆற்றிய உரையில் குறிப்பிடப்பட்டுள்ளது. இதில், இந்தியன் ஓவா்சீஸ் வங்கியும் ஒன்றாக உள்ளது தமிழக மக்களுக்கு அதிா்ச்சியை ஏற்படுத்தியுள்ளது.எனவே இந்தியன் ஓவா்சீஸ் வங்கியை தனியாா் மயமாக்கும் முயற்சியை கைவிட வேண்டும் என்று அதில் அவா் குறிப்பிட்டுள்ளாா்.