தமிழகத்தில் மிகப்பெரிய எழுச்சி ஏற்பட்டுள்ளது- பொன். ராதாகிருஷ்ணன்

தமிழகத்தில் மக்கள் ஆர்வமாக வந்து வாக்களிப்பதை பார்க்கும்போது மிகப்பெரிய எழுச்சி ஏற்பட்டுள்ளது தெரிவதக பொன்.ராதாகிருஷ்ணன் தெரிவித்துள்ளார்.

தமிழக சட்டமன்ற தேர்தலுடன் கன்னியாகுமரி பாராளுமன்ற தொகுதிக்கான இடைத்தேர்தல் இன்று நடைபெறுகிறது. அந்த தொகுதியில் பாரதிய ஜனதா கட்சி சார்பில் போட்டியிடும் பொன்.ராதாகிருஷ்ணன், நாகர்கோவில் எஸ்.எல்.பி. பெண்கள் பள்ளியில் வாக்காளர்களுடன் வரிசையில் காத்து நின்று தனது வாக்கை பதிவு செய்தார். 

பின்பு அவர் செய்தியாளர்களிடம் கூறியதாவது: குமரி மாவட்டத்தில் காலை முதலே ஆர்வமாக வந்து வாக்காளர்கள் வாக்களித்து வருகிறார்கள். எந்த ஒரு சங்கடமும் சிரமமுமின்றி வாக்காளர்கள் வாக்களிக்க ஏற்பாடு செய்யப்பட்டுள்ளது. இதை பார்க்கும்போது மிகப்பெரிய எழுச்சி தமிழகத்தில் ஏற்பட்டுள்ளது. மக்கள் ஆர்வமாக வந்து வாக்களிப்பதை வைத்து பார்க்கும்போது 75 சதவீத வாக்குகள் பதிவாகும் என்று எதிர்பார்க்கிறேன் என்றார்.