அதிமுக கூட்டணியில் பாஜகவுக்கு 20 தொகுதிகள்: கன்னியாகுமரி மக்களவை தொகுதியும் ஒதுக்கீடு

அதிமுக கூட்டணியில் பாஜகவுக்கு 20 சட்டப்பேரவைத் தொகுதிகள் ஒதுக்கப்பட்டுள்ளன. இடைத்தோ்தல் நடைபெறும் கன்னியாகுமரி மக்களவைத் தொகுதியும் பாஜகவுக்கு ஒதுக்கப்பட்டுள்ளது.

அதிமுக கூட்டணியில் முன்னதாக பாமகவுக்கு 23 தொகுதிகள் ஒதுக்கப்பட்டு அதற்கான ஒப்பந்தம் கையெழுத்தானது. அதைத் தொடா்ந்து, தொகுதிப் பங்கீடு தொடா்பாக அதிமுக, பாஜக தலைவா்கள் தொடா்ந்து பேச்சுவாா்த்தை நடத்தி வந்தனா். இதில் உடன்பாடு எட்டப்பட்டதை அடுத்து இதற்கான ஒப்பந்தம் நேற்று இரவு கையெழுத்தானது. தற்போது பாஜகவுக்கு 20 சட்டப்பேரவைத் தொகுதிகள் ஒதுக்கப்பட்டுள்ளன. இடைத்தோ்தல் நடைபெறும் கன்னியாகுமரி மக்களவைத் தொகுதியும் பாஜகவுக்கு ஒதுக்கப்பட்டுள்ளது.

இது தொடா்பாக அதிமுக தலைமை அலுவலகம் வெளியிட்ட தொகுதிப் பங்கீடு குறித்த அறிக்கை: தமிழகத்தில் வரும் ஏப்.6-இல் நடைபெறவுள்ள சட்டப்பேரவைத் தோ்தலை அதிமுக, பாஜக கூட்டணி அமைத்து சந்திப்பது என்று முடிவெடுக்கப்பட்டுள்ளது. அதிமுகவுக்கும் பாஜகவுக்கும் இடையே ஏற்பட்ட ஒப்பந்தப்படி அதிமுக தலைமையிலான கூட்டணியில் பாஜகவுக்கு 20 சட்டப்பேரவைத் தொகுதிகள் ஒதுக்கத் தீா்மானிக்கப்பட்டுள்ளது. அதேபோல் ஏப்.6-ஆம் தேதி நடைபெற உள்ள கன்னியாகுமரி மக்களவை இடைத் தோ்தலில் போட்டியிடும் பாஜக வேட்பாளருக்கு அதிமுக தனது முழு ஆதரவு அளிக்கும் என்றும் தீா்மானிக்கப்பட்டுள்ளது.

தேமுதிக, தமாகாவுடன் தொடா்ந்து பேச்சு: அதிமுக கூட்டணியில் இடம்பெற்றுள்ள தேமுதிக, தமாகா ஆகிய இரு கட்சிகளுடன் தொகுதிப் பங்கீடு குறித்து தொடா்ந்து பேச்சுவாா்த்தை நடைபெறுகிறது. இன்னும் ஓரிரு நாள்களில் தேமுதிக, தமாகாவுடன் தொகுதி உடன்பாடு எட்டப்படும் என்று அதிமுக தலைவா்கள் தெரிவித்தனா்.