சிகரெட் வாங்குவது போல் நடித்து பெண்ணிடம் நகை பறிப்பு

தக்கலை அருகே சிகரெட் வாங்குவது போல் நடித்து பெண்ணிடம் மர்ம நபர்கள் நகை பறித்து சென்ற சம்பவம் பரபரப்பை ஏற்படுத்தியது.

தக்கலை அருகே புலியூர்குறிச்சி தோப்பு பகுதியை சேர்ந்தவர் பயஸ், விவசாயி. இவரது மனைவி விஜயா (47). இவர் புலியூர்குறிச்சி பகுதியில் பெட்டி கடை நடத்தி வருகிறார். நேற்று இரவு 9 மணியளவில் விஜயா கடையில் இருந்த போது மோட்டார் சைக்கிளில் இரண்டு மர்ம நபர்கள் வந்தனர். அவர்கள் கடையின் அருகே மோட்டார் சைக்கிளை நிறுத்தி விட்டு பின்னால் இந்த நபர் இறங்கி விஜயாவிடம் சென்று சிகரெட் வேண்டும் என கேட்டார். அவர் சிகரெட் எடுப்பதற்காக திரும்பிய போது அவரது கழுத்தில் கிடந்த 5½ பவுன் தங்க சங்கிலியை பறித்தான்.

இதனால் அதிர்ச்சி அடைந்த விஜயா சத்தம் போட்ட நிலையில் நகையை காப்பாற்ற கொள்ளையனிடம் போராடினார். ஆனால், அந்த நபர் அவரை தாக்கி கீழே தள்ளிவிட்டு மோட்டார் சைக்கிளில் ஏறி கூட்டாளியுடன் தப்பி சென்றான். இதுகுறித்து தக்கலை போலீசுக்கு தகவல் ெகாடுக்கப்பட்டது. போலீசார் சம்பவ இடத்துக்கு சென்று விசாரணை நடத்தினர். அந்த பகுதியில் உள்ள கண்காணிப்பு கேமராவில் பதிவான காட்சிகளை கைப்பற்றி ஆய்வு செய்தனர். அதில் நகை பறிப்பில் ஈடுபட்ட மர்ம நபர்களின் உருவம் பதிவாகி இருந்தது. அதை கைப்பற்றிய போலீசார் மர்ம நபர்களை தேடி வருகிறார்கள். சிகரெட் வாங்குவது போல் நடித்து பெண்ணிடம் நகை பறித்து சென்ற சம்பவம் அந்த பகுதியில் பரபரப்பை ஏற்படுத்தியது.