» செய்திகள் - விளையாட்டு » உலகம்

இந்தோனேசியாவில் பயங்கர நிலநடுக்கம் : கட்டிட இடிபாடுகளில் சிக்கி 26 பேர் பலி

சனி 16, ஜனவரி 2021 9:18:20 AM (IST)



இந்தோனேசியாவில் ஏற்பட்ட பயங்கர நிலநடுக்கத்தால் கட்டிட இடிபாடுகளில் சிக்கி 26 பேர் உயிரிழந்தனர்.

தென்கிழக்கு ஆசிய நாடான இந்தோனேசியா, நெருப்பு வளையம் என்று அழைக்கப்படும் புவித்தட்டுகள் அடிக்கடி நகரும் இடத்தில் அமைந்துள்ளதால் அங்கு நிலநடுக்கம் ஏற்படுவது வாடிக்கையான ஒன்றாக உள்ளது. ஒவ்வொரு ஆண்டும் 100-க்கும் மேற்பட்ட முறை நிலநடுக்கங்கள் ஏற்படுகின்றன. இதில் ஒரு சில நிலநடுக்கங்கள் மிகப்பெரிய அளவில் தாக்கி பெரும் உயிர்ச்சேதங்களை ஏற்படுத்தி விடுகின்றன.

இந்தநிலையில் இந்தோனேசியாவின் கிழக்கு பகுதியில் உள்ள சுலவேசி தீவில் நேற்று காலை பயங்கர நிலநடுக்கம் ஏற்பட்டது. உள்ளூர் நேரப்படி அதிகாலை 1 மணிக்கு ஏற்பட்ட இந்த நிலநடுக்கம் ரிக்டர் அளவுகோலில் 6.2 புள்ளிகளாக பதிவானது. இந்த நிலநடுக்கம் சுலவேசி தீவின் மஜீனே நகருக்கு 6 கிலோ மீட்டர் வடகிழக்கே பூமிக்கு அடியில் 10 கிலோ மீட்டர் ஆழத்தில் மையம் கொண்டிருந்ததாக இந்தோனேசிய பேரிடர் முகமை அறிவித்துள்ளது.

7 வினாடிகள் வரை நீடித்த இந்த நிலநடுக்கத்தின் போது வீடுகள், கடைகள் உள்ளிட்ட கட்டிடங்கள் பயங்கரமாக குலுங்கின. அதிகாலை நேரம் என்பதால் மக்கள் அனைவரும் அயர்ந்து தூங்கிக் கொண்டிருந்தனர். நிலநடுக்கத்தால் ஏற்பட்ட அதிர்வால் அவர்கள் திடுக்கிட்டு எழுந்தனர். பின்னர் அவர்கள் அலறி அடித்தபடி வீடுகளை விட்டு வெளியேறி வீதிகளில் தஞ்சம் புகுந்தனர். இந்த நிலநடுக்கத்தின் போது மஜீனே நகரில் ஏராளமான வீடுகள், 2 ஓட்டல்கள் மற்றும் ஒரு வணிக வளாகம் ஆகியவை இடிந்து விழுந்து தரைமட்டமாகின.‌

அதேபோல் அந்த நகரில் உள்ள சுலவேசி மாகாண கவர்னரின் அலுவலகம் நிலநடுக்கத்தால் தரைமட்டமானது. இதனிடையே மஜீனே நகருக்கு அருகிலுள்ள மாமுஜு நகரில் மருத்துவமனை ஒன்று இடிந்து விழுந்தது. இப்படி பல கட்டிடங்கள் சீட்டு கட்டை போல் சரிந்ததில் ஏராளமான மக்கள் இடிபாடுகளில் சிக்கினர்.‌ இதனைத்தொடர்ந்து நிலநடுக்கம் தாக்கிய பகுதிகளில் உடனடியாக மீட்புப் பணிகள் முடுக்கி விடப்பட்டன.

இந்த நிலநடுக்கத்தால் இதுவரை 26 பேர் உயிரிழந்ததாகவும் 600-க்கும் மேற்பட்டோர் படுகாயம் அடைந்துள்ளதாகவும் அங்கிருந்து வரும் தகவல்கள் தெரிவிக்கின்றன. இடிபாடுகளுக்குள் இன்னும் பலர் சிக்கி இருப்பதால் பலி எண்ணிக்கை மேலும் உயரலாம் என அஞ்சப்படுகிறது. மாமுஜு நகரில் மருத்துவமனை இடிந்து விழுந்ததில் 6 நோயாளிகளும் அவர்களின் குடும்பத்தினரும் இடிபாடுகளில் சிக்கியதாக கூறப்படுகிறது. அவர்களை உயிருடன் மீட்பதற்கான முயற்சிகள் முழுவீச்சில் நடந்து வருகின்றன‌.

இதனிடையே இந்த நிலநடுக்கம் சக்தி வாய்ந்ததாக அமைந்த போதிலும் சுனாமி எச்சரிக்கை எதுவும் விடுக்கப்படவில்லை. இருப்பினும் கடலோரம் வசிக்கும் ஆயிரக்கணக்கான மக்கள் தங்கள் வீடுகளை விட்டு வெளியேறி பாதுகாப்பான இடங்களுக்கு சென்றுவிட்டனர். முன்னதாக கடந்த 2018-ல் இதே சுலவேசி தீவில் ரிக்டர் அளவுகோலில் 7.5 புள்ளிகள் அளவில் ஏற்பட நிலநடுக்கம் மற்றும் அதனால் உருவான சுனாமியில் 2 ஆயிரத்துக்கும் அதிகமானோர் உயிரிழந்தது நினைவுகூரத்தக்கது.


மக்கள் கருத்து


மக்கள் பதிவு செய்யும் கருத்துகள் தணிக்கையின்றி பிரசுரமாகும் வகையில் மென்பொருள் வடிவமைக்கப்பட்டுள்ளது. தொழில்நுட்ப குறைபாடுகள் காரணமாக கருத்துக்கள் பதிவாவதில் சிறிது காலதாமதம் ஏற்பட வாய்ப்புள்ளது. வாசகர்களின் கருத்துக்களுக்கு நிர்வாகம் பொறுப்பாக மாட்டார்கள். நாகரீகமற்ற மற்றும் பிறர் மனதை புண்படுத்தகூடிய கருத்துகளை / வார்த்தைகளைப் பயன்படுத்துவதை தவிர்க்கும்படி கேட்டுக்கொள்கிறோம்.

ஆங்கிலத்தில் தட்டச்சு செய்ய Ctrl+G -ஐ அழுத்தவும்.



மேலும் தொடரும் செய்திகள்

Sponsored Ads



Thoothukudi Business Directory