ராகுல் காந்தியை சதாம் உசேனுடன் ஒப்பிடுவதா? - அசாம் முதல்வருக்கு காங்கிரஸ் கண்டனம்!

காங்கிரஸ் கட்சியின் முன்னாள் தலைவர் ராகுல் காந்தி இந்திய ஒற்றுமை யாத்திரை என்ற பெயரில் கன்னியாகுமரியில் கடந்த செப்டம்பர் மாதம் 7-ம் தேதி பாதயாத்திரையை தொடங்கினார். கேரளா, கர்நாடகம், தெலுங்கானா, ஆந்திர பிரதேசம் என தென் மாநிலங்களில் நீடித்து, பின்னர் மகாராஷ்டிராவிற்கு சென்றது. அதன்பின், நேற்று 77-வது நாளில் மத்திய பிரதேசத்திற்கு ராகுல் காந்தி வருகை தந்துள்ளார்.

இதற்கிடையே, அசாம் முதல் அமைச்சர் ஹிமந்தா பிஸ்வா சர்மா கூறும்போது, ராகுல் காந்தியின் முகம் மாறியுள்ளது. உங்களது தோற்றத்தினை மாற்றவேண்டும் என நீங்கள் விரும்பினால், வல்லபாய் பட்டேல் அல்லது ஜவகர்லால் நேரு போல் மாற்றுங்கள். காந்திஜி போன்று கூட நீங்கள் நன்றாக தோற்றமளிப்பீர்கள். ஆனால், சதாம் உசேனைப் போன்று தற்போது காணப்படுகிறீர்கள். இதுவே காங்கிரஸ் தலைவர்களின் பழக்க வழக்கங்கள், இந்திய கலாசாரத்துடன் நெருங்கிய வகையில் இல்லாமல் இருப்பதற்கு காரணம். அவர்கள் எப்போதும் மற்றவர்களின் கலாசாரங்களை தத்தெடுத்து கொள்ள முயற்சிக்கின்றனர் என பேசியுள்ளார்.

இந்நிலையில், அசாம் முதல் அமைச்சர் பேச்சுக்கு காங்கிரஸ் தரப்பில் கடும் கண்டனம் தெரிவிக்கப்பட்டது. இதுதொடர்பாக, காங்கிரசின் சந்தீப் தீட்சித் கூறுகையில், பாதயாத்திரையால் அவர்கள் அதிர்ந்து போயுள்ளனர். இந்த அளவுக்கு அவர்கள் தாழ்ந்து போவார்கள் என நினைக்கவில்லை. உங்களது தலைவர் (பிரதமர் மோடி) தாடி வளர்க்கும்போது, நாங்கள் எதுவும் கூறவில்லை. நாங்கள் உண்மையான விவகாரங்களைப் பற்றி பேசுகிறோம் என தெரிவித்துள்ளார்.